جدہ : اسلامی ممالک کی تنظیم(اوآئی سی) نے فلسطینیوں کے خلاف اسرائیلی جارحیت کی مذمت کرتے ہوئے مطالبہ کیا ہے کہ عالمی برادری مداخلت کرے اور فلسطینیوں کے خلاف اسرائیلی جارحیت رکوائے۔
اوآئی سی کے مطابق اسرائیلی جارحیت کے نتیجے میں سیکڑوں فلسطینی شہید اور زخمی ہوئے، مشرقِ وسطیٰ میں عدم استحکام کی وجہ فلسطین پراسرائیلی قبضہ اور عالمی قراردادوں کو تسلیم نہ کرنا ہے۔
او آئی سی نے موجودہ حالات کا ذمے دار اسرائیل کو ٹھہراتے ہوئے کہا کہ مشرقِ وسطیٰ میں عدم استحکام کی وجہ اسرائیل کی جانب سے فلسطینیوں کی روزانہ کی بنیاد پر نسل کشی اور فلسطینی علاقوں پر حملے ہیں۔
اوآئی سی نے فلسطین پر اسرائیلی جارحیت کے بارے میں یاد دہانی کرواتے ہوئے کہا کہ اسرائیلی جنگی طیاروں نے غزہ پر وحشیانہ بمباری کی جس کی وجہ سےعمارتیں تباہ اور بیسیوں فلسطینی شہید ہوئے۔اسلامی تعاون کی تنظیم کا کہنا ہے کہ عالمی برادری فلسطینی عوام کا تحفظ کرے اور فلسطینی علاقوں سے اسرائیلی قبضہ ختم کروانے کے لیے سنجیدہ سیاسی عمل کے لیے تعاون کرے۔
او آئی سی کا یہ بھی کہنا ہے کہ فلسطینی علاقوں سے اسرائیلی قبضہ ختم کروا کر فلسطینی ریاست قائم کی جائے۔

حماس اور اسرائیل کے درمیان گھمسان کی لڑائی  کے بعد سے غزہ کی پٹی میں اب تک ایک لاکھ 23 ہزار افراد بے گھر ہوچکے ہیں۔

اقوام متحدہ کی ایجنسی (او سی ایچ اے) نے بتایا ہے  کہ غزہ میں ایک لاکھ 23 ہزار 538 افراد بے گھر ہو چکے ہیں، جس کی بڑی وجہ خوف، عدم تحفظ اور گھروں کا تباہ ہونا ہے۔

اسرائیلی بمباری سے 159 ہاؤسنگ یونٹس مکمل تباہ اور 1210 گھروں کو شدید نقصان پہنچا ہے،  73 ہزار سے زائد افراد نے سکولوں میں پناہ لے رکھی ہے، جن میں سے کچھ افراد کو ہنگامی شیلٹرز فراہم کر دیے گئے ہیں۔

اقوام متحدہ کی ایجنسی برائے مہاجرین (یو این آر ڈبلیو اے) کے ترجمان عدنان ابو حسنہ نے بتایا ہے کہ بے گھر افراد کی تعداد میں اضافہ ہو سکتا ہے۔

بیجنگ:چین کی ریڈ کراس سوسائٹی نے افغان زلزلہ متاثرین کے لیے نقد امداد کی پیشکش کر دی ۔ چینی میڈیا کی رپورٹ کے مطابق چین کی ریڈ کراس سوسائٹی نے زلزلہ متاثرین کی مدد کے لیے نقد امداد کی پیشکش کی ہے کہ چین کی ریڈ کراس سوسائٹی نے افغان ریڈ کریسنٹ سوسائٹی کے لیے 2 لاکھ ڈالر امداد کی پیشکش کی ہے۔امداد کا مقصد زلزلے کے بعد ریسکیو اور ریلیف کے کاموں میں مدد فراہم کرنا ہے۔ واضح رہے کہ افغانستان میں 2 روز قبل آنے والے6.3 شدت کے زلزلے میں 2445 اموات ہو چکی ہیں۔

حماس نے خود سے کئی گنا بڑی اور جدید ترین اسلحے اور جاسوس ٹیکنالوجی سے لیس اسرائیلی فوج کیخلاف کامیاب اور بڑی کارروائی کر کے دنیا کو حیران کر دیا۔

حماس نے اسرائیل پر تاریخی حملے کے لیے ایک ہزار نوجوانوں کی خصوصی فورس تیار کی تھی، حماس کی اس منصوبہ بندی کہ ان کی اسپیشل فورس کے اہلکار اپنے اہداف تک اچانک آسمان سے چھلانگ لگا کر یا سمندر کا سینہ چیر کر پہنچیں اور دشمن کو سنبھلنے کا بالکل بھی موقع نہ ملے،اس کیلئے حماس نے اپنے جانبازوں کو پیرا گلائیڈرز، بلڈورز اور خطرناک موٹر سائیکلنگ کی خصوصی تربیت دلوائی اور یہ تینوں مہارتیں ہی آپریشن کی کامیابی کا سبب بنیں۔

حماس کے قریبی ذرائع نے رائٹرز کو بتایا کہ پیرا گلائیڈرز سے لینڈنگ اور موٹر سائیکلنگ کے ذریعے ہدف تک پہنچنے اور پھر بلڈورز کی مدد سے مضبوط دیواروں اور رکاوٹوں کو گرانے کی مشق کے لیے غزہ میں ایک فرضی اسرائیلی بستی تعمیر کی گئی تھی ، اس بستی میں تمام فرضی اہداف بنائے گئے تھے جہاں حماس کے پیراگلائیڈرز سرحد پار کرنے کی مشق کرکے اترتے، پھر موٹر سائیکلوں سے اہداف تک گئے اور بلڈوزر سے رکاوٹوں کو ہٹاتے ہوئے فرضی اسرائیلی فوجیوں کو گرفتار کرتے۔

دلچسپ بات یہ ہے کہ حماس کو یہ مشقیں کرتے ہوئے اسرائیلی فوج نے دیکھا بھی تھا لیکن وہ ان پر ہنستے تھے اور اس مشق کو وقت گزاری کے لیے ایک فضول کھیل سمجھ رہے تھے،اسرائیلی فوج کو یہ بھی یقین ہو گیا تھا کہ حماس اب کسی بڑے تصادم میں پڑنے کی خواہش مند نہیں،اور حماس نے اسرائیل کی اسکی  زیادہ  خود اعتمادی کا فائدہ اُٹھایا۔

یاد رہے کہ کچھ عرصے سے حماس نے بڑی کارروائیاں روک دی جس پر اسے مقامی سطح پر تنقید کا نشانہ بنایا جا رہا تھا جبکہ عالمی سطح پر یہ بات مشہور ہوگئی تھی کہ حماس کے پاس کسی بڑی کارروائی کے لیے پیسے نہیں ہیں، اس خاموشی کو اسرائیل نے طوفان کا پیش خیمہ نہیں سمجھا اور یہیں ان سے چوک ہو گئی۔

حماس نے بڑی ہوشیاری سے اسرائیل کو دکھایا کہ مزاحمتی تنظیم اب عسکری کارروائیوں کے بجائے فلسطینی نوجوانوں کو اپنے معاشی حالات درست کرنے کیلئےمختلف اسکلز سیکھنے کی صلاح دے رہی ہے، آخر وہ دن آگیا جس کی مشق کے لیے حماس نے پوری ایک بستی قائم کی تھی۔

حماس کے جانباز قدیم انجنوں سے چلنے والے پیراگلائیڈرز کے ذریعے غزہ کی پٹی سے اڑے اور فضاؤں میں سفر کرتے ہوئے سرحدوں، چوکیوں اور خاردار تاروں کو عبور کرتے گئے،اسرائیلی فوج کو مشغول کرنے کے لیے حماس نے دوسری جانب سے راکٹ داغے جس سے اسرائیل کی ساری توجہ راکٹس حملوں پر مرکوز ہو گئی اور پیرا گلائیڈرز بآسانی اتر گئے۔

موٹر سائیکلوں کے ذریعے ایک ایک ہدف فوجی اڈے، ان کے گھر اور بیرکوں تک پہنچے اور بلڈورز کی مدد سے رکاوٹوں کو ہٹا کر دیواروں کو گرا کر اندر چھپے اسرائیلی فوجیوں کو دھر لیا جو مقابل آئے انھیں ہلاک کردیا۔