بھارتی ریاست کرناٹک میں پٹاخوں کی  دکان میں دھماکے کے بعد آگ بھڑک اُٹھی جس میں 12 افراد جھلس کر ہلاک ہو گئے۔

بھارتی میڈیا کے مطابق یہ دکان نوین نامی شخص کی ملکیت تھی ،جس میں آتش بازی کا سامان فروخت کیا جاتا تھا۔ دھماکے کے بعد لگنے والی آگ تیزی سے پھیلی اور کسی کو دکان سے باہر نکلنے کا موقع نہیں مل سکا، آگ نے دکان کے باہر کھڑی دو گاڑیوں کو بھی لپیٹ  میں لے لیا۔ دونوں گاڑیاں جل کر راکھ ہو گئیں۔

 دھماکا اس وقت ہوا جب ایک ٹرک سے آتش بازی کا سامان دکان میں منتقل کیا جا رہا تھا ، دکان کے اندر ہی 5 افراد بری جھلس کر ہلاک ہوگئے تھے جب کہ 7 نے  اسپتال میں دم توڑا۔ پولیس نے واقعے کی تحقیقات کے لیے انکوائری کمیٹی تشکیل دیدی۔

حماس کے حملوں کے بعد فرار کی کوشش کرنے والے اسرائیلی ہوائی اڈوں پر پھنس گئے۔

اسرائیلیوں کی بڑی تعداد جان بچانے کیلئے ہوئی اڈوں کی جانب بھاگ کھڑی ہوئی، ان میں زیادہ تر وہ اسرائیلی تھے جنہیں دنیا بھر سے یہاں لاکر بسایا گیا تھا اور دوسری شہریت بھی رکھتے تھے، لیکن جب یہ اسرائیلی ہوائی اڈوں پر پہنچے تو انہیں یہ جان کر شدید جھٹکا لگا کہ ایئرپورٹس اتھارٹی نے ملک کے جنوب اور مرکز کے ہوائی اڈے نجی اور سیاحتی پروازوں کے لیے بند کردیئے ہیں۔

اسرائیلی ائیرپورٹس اتھارٹی کے مطابق ’بین گوریون ہوائی اڈہ سکیورٹی کے پیش نظر کھلا رہا۔‘ لیکن غیر ملکی ایئر لائنز نے اسرائیل کے لیے طے شدہ پروازیں منسوخ کر دی ہیں،بین گوریون ہوائی اڈے کی ویب سائٹ سے پتہ چلتا ہے کہ غیر ملکی ایئر لائنز نے ان پروازوں کو منسوخ کرنا شروع کر دیا ہے جو اسرائیل میں اترنے والی تھیں۔

ایزی جیٹ نے ایمسٹرڈیم سے ایک فلائٹ منسوخ کی، اس فلائٹ نے رات ایک بجے بن گوریون پر اترنا تھا، لفتھناسا نے فرینکفرٹ اور میونخ سے جبکہ وِز ائیر، ولنیئس، آئیبیریا،رائن ائیر اور ڈیلٹا ایئر لائنز نے بھی  اسرائیل جانے والی پروازیں منسوخ کر دیں۔

حماس کے سربراہ اسماعیل ہانیہ نے کہا ہے کہ غزہ میں شروع ہونے والی جنگ ’مغربی کنارے اور یروشلم تک پھیل جائے گی۔

عالمی خبر رساں ادارے کے مطابق اسماعیل ہانیہ نے اسرائیل میں کامیاب کارروائی کے بعد کہا ہے کہ آج عوام اپنی سرزمین سے قابضوں کو بھگانے کے لیے تیار ہیں۔ آزادی کی جنگ اب صیہونی وجود کے دل میں داخل ہو گئی اور دشمنوں کو ذلت بھری شکست کا سامنا کرنا پڑا۔ ہماری فتح سے دشمن کی کمزوریاں عیاں ہوگئیں۔

 اسماعیل ہانیہ نے  اسرائیل کے ساتھ سفارتی تعلقات بحال کرنے والے عرب ممالک کو مخاطب کرکے کہا کہ اسرائیل خود اپنی حفاظت نہیں کرسکا تو آپ کو کیا تحفظ فراہم کرے گا اور نہ فلسطین کوئی حل نکال سکتا ہے۔

فلسطینی تنظیم حماس نے کہا ہے کہ ہم اسرائیلی جیلوں میں قید فلسطینیوں کی رہائی کا معاملہ چکتا کرنا چاہتے ہیں، جنگ کے علاوہ ہمارے پاس کوئی دوسرا آپشن نہیں۔

سعودی نشریاتی ادارے سے بات کرتے ہوئے حماس کے ترجمان حازم قاسم کا کہنا تھا کہ  آپریشن باقاعدہ منصوبہ بندی کے ساتھ کیا گیا ہے،اسرائیل کے ساتھ لڑائی ابتدائی مرحلے میں ہے، فی الحال حماس کے زیر حراست اسرائیلیوں کی تعداد ظاہر نہیں کر رہے، تاہم اسرائیلی جیلوں میں قید فلسطینیوں کی رہائی کا معاملہ برابرکرنا چاہتے ہیں۔

ترجمان نے مزید کہا کہ تمام ممکنہ منظر ناموں کے لیے تیار ہیں اور اسرائیل کا مقابلہ کرنے کی سکت رکھتے ہیں۔

مصر میں پولیس اہلکار کی فائرنگ سے  2 اسرائیلی سیاح اور ایک مصری گائیڈ ہلاک ہو گیا۔

عالمی خبر رساں ادارے کے مطابق یہ واقعہ اسکندریہ میں پومپی کے ستون کے مقام پر پیش آیا جہاں ایک پولیس اہلکار نے اسرائیلی سیاحوں کے گروپ پر فائرنگ کردی جس میں دو اسرائیلی ہلاک اور ایک مصری  زخمی ہو گیا، بعد ازاں مصری دوران علاج اسپتال میں دم توڑ دیا۔

پولیس نے فائرنگ کرنے والے اہلکار کو گرفتار کر لیا تاہم اس کی شناخت ظاہر نہیں کی گئی اور نہ ہی ۔فائرنگ کے واقعے کے محرک کا تعین ہوسکا ہے

 خیال رہے کہ ہے کہ یہ واقعہ اس وقت پیش آیا جب حماس اور اسرائیل کے درمیان جنگ چھڑ چکی ہے۔