اسلام آباد(مانیٹرنگ ڈیسک) پاکستان میں غیرقانونی طورپرمقیم تمام غیرملکیوں کوملک بدرکرنے کافیصلہ کرلیا گیا۔

اسلام آباد میں نگران وزیراعظم انوارالحق کاکڑکی زیرصدارت اپیکس کمیٹی کے اجلاس میں انتہائی اہم فیصلے کئے گئے ہیں جن میں غیر قانونی طورپرمقیم تمام غیرملکیوں کی ملک بدری کافیصلہ بھی شامل ہے ۔

اجلاس میں آرمی چیف جنرل سیدعاصم منیر بھی شریک تھے ۔ اجلاس سے خطاب کرتے ہوئے آرمی چیف کا کہنا تھا کہ ایک پاکستانی کی جان ومال دنیاکے کسی بھی دوسرے مفاد سے مقدم ہے ۔

اجلاس کے بعد میڈیا کو بریفنگ دیتے ہوئے نگران وزیرداخلہ سرفراز بگٹی نے کہا کہ غیرقانونی طورپر پاکستان میں موجود غیرملکیوں کو ملک چھوڑنے کے لئے یکم نومبر2023 کی حتمی ڈیڈ لائن دی گئی ہے  ، ڈیڈ لائن ختم ہونے پرایسے تمام افراد کو ملک بدر کرکے ان کی جائیدادیں قرق اورکاروباربند کردیئے جائیں گے جن کے پاس سکونت کا اجازت نامہ نہیں ہوگا۔

وزیرداخلہ نے کہا کہ پاکستان واحد ملک ہے جہاں غیرملکی پاسپورٹ کے بغیر بھی آجاتے ہیں،انہوں نے واضح کیا کہ جس نے پاکستان آنا ہے وہ پاسپورٹ لے کرآئے ، افغان مہاجرین کے حوالے سے ان کا کہنا تھا کہ صرف ایسے افغان مہاجرین جن کے پاس سکونت کا اجازت نامہ ہے انہیں رہنے کی اجازت ہوگی باقی تمام غیرملکیوں کو ہدایت کی جاتی ہے کہ وہ یکم نومبر سے پہلے ملک چھوڑدیں ۔

وزیرداخلہ نے بتایا کہ 10 اکتوبر 2023 سے پاک افغان سرحد سے نقل و حرکت کمپیوٹرائزڈ شناختی کارڈ پر ہو گی،یکم نومبر 2023 سے نقل و حرکت کی اجازت صرف پاسپورٹ اور ویزا پر دی جائے گی۔

سرفرازبگٹی کاکہناتھا کہ اپیکس کمیٹی اجلاس میں فیصلہ کیاگیاکہ یکم نومبر 2023 کے بعد پاکستان میں مقیم غیر قانونی غیر ملکیوں کو رہائش فراہم کرنے یا سہولیات فراہم کرنے والے کسی بھی پاکستانی شہری یا کمپنی کے خلاف سخت قانونی کاروائی کی جائے گی۔

وزارت داخلہ کی زیر نگرانی ایک ٹاسک فورس تشکیل دی گئی ہے جس میں قانون نافذ کرنے والے اور انٹیلیجنس کے اراکین شامل ہوں گے، اس ٹاسک فورس کا مقصد جعلی شناختی کارڈ کے حامل لوگوں اور ان کی جعلی کاغذات پر بنی غیر قانونی جائیدادوں کو ضبط کرنا ہو گا۔ نادرا کو ہدایت کی گئی ہے کہ وہ تمام جعلی شناختی کارڈز کی منسوخی کوفوری طور پر یقینی بنائے اوراگر کسی کی شناخت میں شک ہو تو اس کی تصدیق کیلئے ڈی این اے ٹیسٹ کرایا جائے۔

اجلاس میں کہاگیاکہ ویب پورٹل اور یو اے این ہیلپ لائن پر پاکستان میں مقیم غیر ملکی افرادکی غیر قانونی رہائش یا کاروبار کرنے والے کے بارے میں معلومات فراہم کی جا سکتی ہیں۔ اس سلسلے میں جو بھی شہری حکومت سے تعاون کرے گا اس کو انعام دیا جائے گا اور اس کا نام صیغہ راز میں رکھا جائے گا۔

سرفرازبگٹی کاکہناتھا کہ  ذخیرہ اندوزی، سامان یا کرنسی کی اسمگلنگ ، حوالہ/ ہنڈی اور بجلی چوری کے خلاف سخت ایکشن پہلے سے ہی لیا جا رہا ہے، منشیات کے کاروباراورجرائم میں ملوث افرد کے خلاف کسی بھی قسم کی رعائت نہیں برتی جائے گی۔ کسی بھی سیاسی مسلح گروہ، جتھے یا تنظیم کے ساتھ آہنی ہاتھوں سے نمٹا جائیگا۔

پنجاب حکومت نے غیر قانونی طور پر مقیم غیر ملکیوں کی تفصیلات طلب کر لیں۔
محکمہ داخلہ کے مراسلے کے مطابق ایپکس کمیٹی میں غیر قانونی طور پر مقیم غیرملکیوں کو ملک بدر کرنے کے فیصلے پر عملدرآمد کرتے ہوئے محکمہ داخلہ پنجاب نے صوبہ بھر کے ڈپٹی کمشنرز سے غیر ملکیوں کی تفصیلات مانگ لیں ۔
مراسلے کے مطابق غیرقانونی مقیم غیرملکیوں کی وطن واپسی کیلئے جامع حکمت عملی مرتب کی جائے گی اور ان کو سفارتخانوں کےتعاون سے واپس بھیجا جائے گا۔
مراسلے میں کہا گیا ہے کہ غیرملکیوں کو رہائشی، مالی اور روزگار کی شکل میں غیر قانونی مقیم افراد کی معاونت کرنا بھی جرم ہے، فارن ایکٹ کے تحت غیر قانونی  قیام کرنے والے غیر ملکیوں کے خلاف کارروائی کی جائے گی۔
علاوہ ازیں حکومت سندھ نے غیر قانونی تارکین وطن کی واپسی کے لیے اہم اقدام اٹھاتے ہوئے صوبائی، ڈویژن اور ضلعی سطح پر عمل درآمد کمیٹیاں قائم کردیں۔ صوبائی تارکین وطن کی واپسی کمیٹی کے کنوینر ایڈیشنل چیف سیکرٹری داخلہ ہوں گے۔
نوٹیفکیشن کے مطابق ڈویژنل کمیٹی کے کنوینر کمشنرز اور ضلعی کمیٹی کے کنوینر ڈپٹی کمشنرز ہوں گے ، غیر ملکی تارکین کی واپسی عملدرآمد کمیٹی میں پولیس، کورہیڈکوارٹر، آئی بی، نادرا، ایف آئی اے، آئی ایس ۔آئی، ایم آئی اور کمشنر افغان پناہ گزینوں کے نمائندے شامل ہیں۔نوٹیفکیشن کے مطابق کمیٹیاں غیر رجسٹرڈ تارکین وطن افراد کا ڈیٹا جمع کریں گی  اور ان کی ملک بدری اورآمد کی روک تھام کے لیے اقدامات کرنے کی ذمہ دار ہوں گی۔

اسلام آباد کے علاقے بہارہ کہو میں کرین گرنے سے تعمیراتی کام میں مصروف  3 مزدور جاں بحق جبکہ ایک زخمی ہو گیا۔

حادثے کی اطلاع ملتے ہی پولیس اور ریسکیو ٹیمیں موقع پر پہنچ گئیں، پولیس حکام کے مطابق جاں بحق مزدوروں کی شناخت قیصر عباس، ثمر شاہ اور وارث کے ناموں سے ہوئی۔

 جاں بحق مزدوروں کی لاشیں اور زخمی کو پولی کلینک ہسپتال منتقل کر دیا گیا۔