امریکی صحافی سارا سینڈر نے اسرائیل کی حمایت پر معافی مانگ لی۔ ان کا کہنا ہے کہ بچوں کےقتل میں حماس کے ملوث ہونے کا ثبوت نہیں دے سکی۔
اسرائیل اور فلسطین کی موجودہ کشیدہ صورتحال کے دوران یہ غلط خبر میڈیا پر چلی کہ حماس نے بچوں کے سر قلم کردیئے۔
امریکی صحافی سارا سینڈر نے بھی بچوں کی اموات پر اسرائیلی مؤقف کی حمایت کی تھی، تاہم حقیقت عیاں ہونے پر انھوں نے معذرت کرلی ہے۔
”ایکس“ پر سارا سینڈر نے اپنے پیغام میں لکھا کہ اسرائیلی وزیر اعظم کے دفتر نے کہا تھا کہ اس نے اس بات کی تصدیق کی ہے کہ حماس نے بچوں کے سر قلم کیے ہیں۔لیکن بعد میں اسرائیلی حکومت کا کہنا تھا کہ وہ اس بات کی تصدیق نہیں کر سکتی کہ بچوں کے سر قلم کیے گئے ہیں۔ اس لئے مجھے اپنے الفاظ کے ساتھ زیادہ محتاط رہنے کی ضرورت تھی اور میں معذرت خواہ ہوں۔

حالیہ اسرائیلی جارحیت پر ایران کا کہنا ہے کہ اسرائیل جنگی جرائم روک دے اس سے پہلے کہ دیر ہو جائے۔
تفصیلات کے مطابق اسرائیل کی جانب سے غزہ کی شہری آبادی پر آٹھویں روز بھی بمباری جاری ہے جس میں ہزاروں معصوم فلسطینی جام شہادت نوش کرچکے ہیں۔ ایرانی وزیر خارجہ حسین امید عبدالہیان کا اپنے بیان میں کہنا ہے کہ اسرائیل غزہ پرحملے بند کرے۔
انھوں نے کہا کہ حزب اللہ جنگ میں شامل ہوئی تو جنگ مشرق وسطیٰ میں پھیل جائے گی۔ جنگ پھیلی تو اسرائیل کو بڑے نقصان کا سامنا کرنا پڑسکتا ہے۔ حزب اللہ نے جنگ کے تمام منظرناموں کو مدنظر رکھا ہے۔
حسین امیرعبداللہیان نے بیروت میں صحافیوں سے گفتگو کرتے ہوئے کہا کہ حزب اللہ نے قدم اٹھا دیا تو اسرائیل کو دوبارہ سنبھلنے کا موقع نہیں ملےگا۔
ایرانی وزیرخارجہ کا کہنا تھا کہ جنگی مجرم کی حمایت کرنے والے ممالک کو بھی خبردار کرتا ہوں۔ حمایت کرنے والے اسرائیل کو روکیں اس سے پہلے کہ دیر ہوجائے۔

تل ابیب میں سیکڑوں لوگوں نے احتجاج کرتے ہوئے اسرائیلی وزیر اعظم نیتن یاہو سے استعفے کا مطالبہ کردیا۔
اسرائیل اور حماس کے درمیان جاری جنگ کے بیچ بنجمن نیتن یاہو کے خلاف لوگ سڑکوں پر نکل آئے ہیں، اسرائیلی عوام نے وزیراعظم سے استعفے کا مطالبہ کیا ہے۔
موجودہ جنگی صورتحال کے باجوود تل ابیب میں سیکڑوں لوگوں نے احتجاجی مظاہرہ کی۔ حماس کے ہاتھوں یرغمال اسرائیلیوں کے اہلخانہ احتجاج کر رہے ہیں۔
احتجاج کرنے والوں کا کہنا تھا کہ حماس کے حملوں میں فوج ناکام ہو گئی، اسرائیلی وزیراعظم اس عہدے کے لائق نہیں ہیں۔
تل ابیب میں غصے میں ابلتے مظاہرین کا کہنا تھا کہ اسرائیلی وزیر اعظم نیتن یاہومستعفی ہوں جب کہ سیکڑوں خاندانوں نے حکومت سے یرغمالیوں کی بازیابی کا مطالبہ بھی کیا ہے۔

انسانوں کی طرح جانوروں میں بھی چھٹی حس ہوتی ہے، لیکن کیا جانور موت کی پیش گوئی بھی کرسکتے ہیں؟
امریکی ریاست روڈ آئی لینڈ کے ایک ریٹائرمینٹ ہوم میں ایک بلی رہتی تھی، جو اس وجہ سے مشہور تھی کہ اسے پتا چل جاتا تھا کہ ریٹائرمینٹ ہوم میں رہنے والا کونسا شخص انتقال کرنے والا ہے۔
آسکر کو 2005 میں روڈ آئی لینڈ نرسنگ ہوم نے گود لیا تھا تاکہ یہاں کے رہائشیوں کو سکون فراہم کیا جا سکے۔یکن جلد ہی عملے نے پایا کہ آسکر زیادہ تر تنہا رہنا پسند کرتی تھی، لیکن جب وہ ریٹائرمنٹ ہوم کے کسی مکین کے ساتھ گھل مل جاتی تو وہ شخص کچھ گھنٹے بعد مرجاتا۔
اس کے بعد عملے نے آسکر کی نقل و حرکت کو ایک انتباہ کے طور پر استعمال کرنا شروع کردیا، اور ان مریضوں کے اہل خانہ سے پہلے ہی رابطہ کرلیا کرتا تھا جن کے ساتھ بلی کھیل رہی ہوتی، تاکہ وہ بلی کے درست ہونے کی صورت میں اپنے پیاروں کو الوداع کہ سکیں۔
ابتدائی طور پر ریٹائرمنٹ ہوم کے ڈاکٹروں نے اس اندازے کو درگزر کیا، لیکن کم از کم 25 مختلف واقعات کے بعد انہیں شک ہونے لگا کہ بلی موت کو محسوس کرسکتی ہے۔

برطانیہ میں فلسطین کا پرچم لہرانے پر پابندی کے اعلان کے باوجود ہزاروں افراد فلسطینی پرچم اٹھائے سڑکوں پر نکل آئے۔
عالمی خبر رساں ادارے کے مطابق لندن اور مانچسٹر سمیت برطانیہ بھر میں ہزاروں افراد فلسطینیوں کی حمایت میں سڑکوں پر نکل آئے۔ مظاہرین نے غزہ پر گزشتہ سات روز سے جاری اسرائیل کی وحشیانہ بمباری فوری طور پر بند کرنے کا مطالبہ کیا۔
لندن میں ہزاروں افراد وزیراعظم کی رہائش گاہ ٹین ڈاؤننگ اسٹریٹ اور بی بی سی ہیڈکوارٹر کے باہر جمع ہوئے اور فلسطین کی آزادی کے حق میں نعرے لگائے۔ مظاہرین نے فلسطینی پرچم اور حمایتی پلے کارڈز بھی اٹھا رکھے تھے۔ درجنوں پولیس افسران وزیر اعظم کی رہائش گاہ کے گیٹ کے باہر تعینات تھے۔ مظاہرین نے ‘رشی سونک شرم کرو، سویلا بریورمین شرم کرو کے نعرے بھی لگائے۔لیورپول، برسٹل، گلاسگو اور نیو کیسل میں بھی ہزاروں افراد نے فلسطین کے حق میں احتجاج کیا جس میں ہر عمر کے مرد، خواتین اور بچے شامل تھے۔

طالبان نے آئندہ ہفتے چین کے ’’بیلٹ اینڈ روڈ فورم‘‘ میں شرکت کا اعلان کردیا۔غیرملکی خبررساں ادارے ’رائٹرز‘ کے مطابق وزارت کے ترجمان اخوندزادہ عبدالسلام جواد نے کہا کہ طالبان کے قائم مقام وزیر تجارت و صنعت حاجی نورالدین عزیزی آنے والے دنوں میں بیجنگ کا دورہ کریں گے۔
ترجمان نے افغان انتظامیہ کے بیجنگ کے ساتھ بڑھتے ہوئے سفارتی تعلقات پر زور دیا۔ انہوں نے کہا کہ وہ فورم میں شرکت کریں گے اور بڑے سرمایہ کاروں کو کابل میں مدعو کریں گے۔
افغانستان کی طالبان حکومت کو ابھی تک دنیا کے کسی بھی ملک نے تسلیم نہیں کیا لیکن چین کی طرف سے افغانستان میں اپنا سفیر تعینات کرنے کے بعد بیلٹ اینڈ روڈ فورم طالبان کو پہلی مرتبہ مدعو کیا گیا ہے۔
بیجنگ میں منگل اور بدھ کو ہونے والے فورم میں صدر شی جن پنگ کے منصوبے کی 10 ویں سالگرہ منائی جا رہی ہے، جس کا مقصد عالمی تجارت کو فروغ دینے کے لیے قدیم شاہراہ ریشم کو دوبارہ بنانے کے لیے پیش کیا گیا ہے۔