چیئرمین نادرا لیفٹیننٹ جنرل منیر افسر نے کہا ہے کہ جعلی فیملی ٹری میں افغانیوں کو شامل کیا جاتا رہا۔

سینیٹ کی داخلہ کمیٹی کو بریفننگ دیتے ہوئے منیر افسر نے بتایا کہ افغانیوں کو جعلی شناختی کارڈ کے اجرا کے معاملے پر 84 اہلکاروں کیخلاف کارروائیاں کی گئی ہیں۔ جعلی دستاویزات، بغیر فنگر پرنٹ یا تصویر کے ریکارڈ کو اہلکار ٹمپر کرتے رہے،انہوں نے مزید کہا کہ نادرا نے جعلی شناختی کارڈر روکنے کے لیے شفاف اور پختہ نظام قائم کیا ہے۔

ڈی جی پاسپورٹ مصطفیٰ قاضی نے کمیٹی اجلاس میں گفتگو کرتے ہوئے کہا ہے کہ پاسپورٹ بنانے کا عمل سست روی کا شکار سامان کی قلت کے سبب ہوا۔  شہریوں کے لیے لازم ہے کہ پہلا پاسپورٹ آبائی ضلع سے حاصل کریں، پہلا پاسپورٹ کسی دوسرے ضلع سے جاری ہونے پر ریکارڈ شو نہیں ہوتا۔

لاہور( این این آئی) پنجاب میں رواں مالی سال کے لئے مزید چار ماہ کے دورانیہ کا بجٹ پیش کرنے کافیصلہ کرلیاگیا۔
نگران پنجاب کابینہ نے رواں بجٹ 31 اکتوبر تک چار ماہ کیلئے منظور کیا تھا اور اس بجٹ پر یکم جولائی سے عمل ہو رہا ہے، اب مزید چار ماہ کے لئے بھی نگران کابینہ ہی بجٹ کی منظوری دے گی۔ پنجاب حکومت نے اس سلسلے میں محکموں سے بجٹ تجاویز مانگ لی ہیں اور خاص طور پر گائیڈ لائن دی گئی ہے کہ جاری ترقیاتی منصوبوں کو ہر صورت مکمل کرنا ترجیح ہو گی جبکہ صحت ، تعلیم اور انفراسٹرکچر کے لئے زیادہ بجٹ مختص ہو گا۔
ذرائع کے مطابق نئے بجٹ میں ٹیکسوں کی شرح میں تبدیلی کا امکان نہیں ہے اور موجودہ شرح کو ہی برقرار رکھا جائے گا، تنخواہ اور پنشن میں بھی کوئی تبدیلی نہیں ہو گی، غیر ترقیاتی اخراجات بھی جاری بجٹ کی شرح سے ہی مقرر ہوں گے تاہم ترقیاتی بجٹ 300 ارب روپے تک ہونے کا امکان ہے۔80 فیصد رقوم جاری ترقیاتی منصوبوں پر خرچ ہوں گی، لاہور، راولپنڈی، فیصل آباد کے علاوہ چھوٹے اضلاع میں انفراسٹرکچر اور پانی فراہمی کے منصوبوں پر زیادہ رقم خرچ کی جائے گی، محکموں کو 21 اکتوبر تک تجاویز کو حتمی شکل دے کر پیش کرنے کی ہدایت کی گئی ہے۔

دنیا کے 500 بااثرمسلمانوں کی فہرست جاری کردی گئی، پاکستانی اسلامی اسکالر مفتی تقی عثمانی، مولانا طارق جمیل اور الیاس قادری بااثر مسلمانوں کی فہرست میں شامل ہیں۔
رائل اسلامک اسٹریٹجک اسٹیڈیز سینٹرکی طرف سے جاری کردہ دنیا کے 500 بااثر ترین مسلمانوں کی فہرست میں خدمت خلق، سائنس، ٹیکنالوجی، میڈیا۔ آرٹس اینڈ کلچر، سیاست اور مذہبی معاملات میں انتظامی صلاحیتوں سمیت تیرہ مختلف کیٹگریز میں نمایاں کارکردگی دکھانے والے 500 با اثر مسلمانوں کے نام ہیں۔
پاکستان سے آرمی چیف جنرل عاصم منیر، نواز شریف، شہباز شریف، چیئرمین پی ٹی آئی عمران خان، پاکستانی اسلامی اسکالر مفتی تقی عثمانی، مولانا طارق جمیل، امیر تبلیغی جماعت پاکستان مولانا نذر الرحمان اور سمیع یوسف بھی 500 بااثر مسلمان شخصیات میں شامل ہیں۔
بااثر مسلمانوں میں پروفیسر نقیب العطاس، سعودی فرمانروا شاہ سلمان بن عبدالعزیز، ترک صدر رجب طیب اردوان، مصری صدر الفتح السیسی، حماس کے سینئر رہنما اسماعیل ہانیہ بھی شامل ہیں جبکہ مصری فٹ بالر محمد صالح بھی فہرست کا حصہ ہیں۔

پاکستان تحریک انصاف کے چیئرمین عمران خان اور بشریٰ بی بی کے خلاف نکاح کیس میں پراسیکیوٹر نے غیرشرعی نکاح سے متعلق مختلف اعلیٰ عدلیہ کے فیصلے عدالت میں جمع کروا دیئے جبکہ عدالت نے آئندہ سماعت پر وکیل صفائی شیر افضل مروت سے دلائل طلب کرلئے۔
ڈسٹرکٹ اینڈ سیشن کورٹ میں چیئرمین پی ٹی آئی، بشریٰ بی بی کے خلاف غیرشرعی نکاح کیس کی سماعت ہوئی۔
سول جج قدرت اللہ کی عدالت میں سماعت کے دوران پرایسکیوٹر رضوان عباسی عدالت پیش ہوئے جبکہ چیئرمین پی ٹی آئی کے وکیل شیرافضل مروت عدالت پیش نہیں ہوئے۔عدالت نے شیر افضل مروت ایڈووکیٹ کو آئندہ سماعت پر کیس کے قابل سماعت ہونے پر دلائل دینے کی ہدایت کرتے ہوئے سماعت 23 اکتوبر تک کے لیے ملتوی کردی۔
معاون وکیل نے عدالت کو بتایا تھاکہ وکیل شیر افضل مروت اسلام آباد ہائیکورٹ میں مصروفیات کے باعث پیش نہیں ہوئے۔

کسٹمز حکام نے لاہور اور شیخوپورہ میں کارروائیوں کے دوران ایک ارب 25 کروڑ مالیت کا سامان ضبط کرلیا ۔ لاہور میں شاہ عالم مارکیٹ اور ریلوے اسٹیشن مارکیٹ میں کسٹمز حکام نے چھاپہ مارا۔
شیخوپورہ میں کسٹمز حکام نے گوداموں پر چھاپے مارکر 89 کروڑ مالیت کا اسمگل شدہ ڈیزل اور پیٹرول پکڑ لیا گیا۔ قبضے میں لئے گئے دیگر سامان میں سگریٹس، تمباکو اور دیگرممنوعہ اشیا شامل ہیں۔

احتساب عدالت اسلام آباد نے سپیکرقومی اسمبلی راجہ پرویزاشرف کو آئندہ سماعت پر حاضری کیلئے ذاتی حیثیت میں طلب کرلیا۔
سپیکر قومی اسمبلی راجہ پرویز اشرف کے خلاف کیسز کی سماعت احتساب عدالت تین کے جج محمد بشیر نے کی، راجہ پرویز اشرف احتساب عدالت میں پیش نہ ہوئے۔
راجہ پرویز اشرف کی جانب سے پلیڈر ارشد تبریز احتساب عدالت پیش ہوئے جس کے بعد عدالت نے راجہ پرویز اشرف کے خلاف کیس کی سماعت 2 نومبر تک ملتوی کردی۔
خیال رہے کہ راجہ پرویز اشرف ریشما، سمندری، رتوڈیرو، ستیانا اور گلف پاور پلانٹ پراجیکٹس سے متعلق ریفرنس میں ملزم نامزد ہیں۔