اسلام آباد: خاتون کی قابل اعتراض تصاویراور ویڈیوز سوشل میڈیا پر شیئر کرنے والے مجرم کوعدالت نے عبرتناک سزاسنادی ۔
وفاقی تحقیقاتی ادارے (ایف آئی اے ) کی طرف سے جمعہ کے روز جاری بیان کے مطابق ملزم انوار الحق نے خاتون کی قابل اعتراض تصاویر اور ویڈیوز سوشل میڈیا پر شئیر کی تھیں ۔

سائبر کرائم سرکل گجرانوالہ نے ملزم کے خلاف 2021 میں مقدمہ درج کرایا تھا۔مقدمے کی سماعت مکمل ہونے پر ایڈیشنل سیشن جج نے انوارالحق کو مجرم قرار دیتے ہوئے 10 سال قید اور 25 لاکھ روپے جرمانے کی سزا سنائی۔

خیبر پختونخوا کے ضلع ہنگو میں دوآبہ تھانے کی مسجد میں ہونے والے خودکش دھماکے میں چار افرادجاں بحق اور 12 زخمی ہوئے ہیں۔
ہنگو میں تھانہ دوآبہ کے ایس ایچ او شابراز خان کے مطابق دھماکہ نمازِ جمعہ کے آخری خطبے کے دوران ہوا جب مسجد میں 30 سے 40 افراد موجود تھے۔
ہنگو کے ڈپٹی کمشنر فضل اکبر خان کے مطابق تھانہ دوآبہ کو دو خودکش حملہ آوروں نے نشانہ بنانے کی کوشش کی اور پہلا دھماکہ تھانے کے باہر ہوا جس کی آواز سن کر نمازیوں کی بڑی تعداد مسجد سے نکل گئی اور جب دوسرے حملہ آور نے مسجد کے اندر دھماکہ کیا تو جانی نقصان کم ہوا۔
مسجد کے اندر ہونے والے دھماکے کی شدت سے عمارت کی چھت گر گئی اور اس کے نیچے متعدد افراد دب گئے جنھیں نکالنے کے لیے ریسکیو 1122 نے آپریشن کیا۔
فضل اکبر خان کے مطابق ملبے سے چار لاشیں اور 12 زخمیوں کو نکالا گیا ہے۔
نگران وزیر اطلاعات خیبر پختونخوا بیرسٹر فیروز جمال شاہ کاکاخیل کے مطابق ہنگو میں پولیس کی بروقت کارروائی سے زیادہ تر نمازی محفوظ رہے۔ ان کا کہنا تھا کہ گاڑی میں سوار دو خودکش حملہ آور تھانے میں داخل ہونے کے لیے پہنچے تھے اور ڈیوٹی پرموجود پولیس اہلکاروں کے ساتھ فائرنگ کے تبادلے میں ایک حملہ آور مسجد سے باہر ہلاک کر دیا گیا۔
دوسرا خودکش حملہ آور مسجد میں داخل ہونے میں کامیاب ہوا اور دھماکہ کردیا۔
فیروز جمال شاہ کے مطابق اگر حملہ آوروں کو نہ روکا جاتا تو بڑے جانی نقصان کا اندیشہ تھا۔

پاکستان اور افغانستان کی سرحد کے قریب ضلع ژوب کے علاقے سمبازہ میں سیکیورٹی فورسز اور دہشتگردوں کے درمیان فائرنگ کا تبادلہ ہوا ہے۔ سیکیورٹی فورسز نے 3 دہشتگردوں کو ہلاک کر دیا ہے جبکہ اس دوران 4 جوان بھی شہید ہو گئے ہیں۔

پاک فوج کے شعبہ تعلقات عامہ (آئی ایس پی آر) نے بتایا ہے کہ 28 ستمبر کو سیکیورٹی فورسز کے جوانوں نے پاک افغان سرحد کے قریب کالعدم تحریک طالبان پاکستان (ٹی ٹی پی) کے دہشت گردوں کی افغانستان سے پاکستان میں دراندازی کی کوشش ناکام بنائی ہے۔

آئی ایس پی آر کے مطابق آپریشن کے دوران حوالدار ستار، لانس نائیک شیر اعظم، لانس نائیک عدنان اور سپاہی ندیم نے جام شہادت نوش کیا ہے۔

فائرنگ کے تبادلے میں 3 دہشتگرد ہلاک جبکہ متعدد زخمی بھی ہوئے ہیں۔

ترجمان آئی ایس پی آر نے کہاکہ سیکیورٹی فورسز دشمنوں کی کارروائیوں کو ناکام بناتی رہیں گی۔

ملک بھر میں آج جشن عید میلادالنبی ؐ بھرپور عقیدت و احترام سے منایا جا رہا ہے، اس اہم دن کی مناسبت سے صدر مملکت عارف علوی اور نگران وزیراعظم انوارالحق کاکڑ نے بھی اپنے پیغامات جاری کیے ہیں۔

صدر مملکت ڈاکٹر عارف علوی نے نبی اکرم ﷺ کی زندگی وسیرت اور اس میں موجود تعلیمات پر غور کرنے کی ضرورت پر زور دیتے ہوئے کہا کہ بحیثیت قوم ہم پر لازم ہے کہ ہم اپنی روزمرہ کی زندگی میں ان اقدار کو قائم کریں اور ایسے ماحول کو فروغ دیں جہاں ہر فرد کی عزت اور حقوق محفوظ ہوں۔

عارف علوی نے کہاکہ نبی کریم ؐ کی تعلیمات دور ِحاضر سمیت رہتی دنیا تکک درپیش بے شمار چیلنجز کا حل پیش کرتی ہیں۔

دوسری جانب نگران وزیراعظم انوارالحق کاکڑ نے اپنے پیغام میں کہا ہے کہ پاکستان اس وقت جن مشکلات اور نازک صورتحال سے دو چار ہے ان میں ہمیں نبی کریمﷺ کی تعلیمات کی طرف رجوع کرنے کی ضرورت ہے۔

انوار الحق کاکڑ نے کہا کہ میں نبی اکرم حضرت محمدﷺ کی ولادت با سعادت کے موقع پر پوری پاکستانی قوم اور امت مسلمہ کو دل کی اتھاہ گہرائیوں سے مبارکباد پیش کرتا ہوں۔

انہوں نے کہا کہ یہ ہماری خوش قسمتی ہے کہ اللہ تعالیٰ نے ہمیں اس رسولﷺ کا امتی بنایا کہ جو رحمتہ اللعالمین ہیں، آپ ؐ کی ہمہ گیر اور جامع الصفات شخصیت ہر انسان کے لئے قابلِ تقلید ہے۔

آرمی چیف جنرل سید عاصم منیر نے اس بات پر زور دیا ہے کہ غیر قانونی معاشی سرگرمیوں کے خلاف کارروائیاں جاری رکھی جائیں۔

پاک فوج کے شعبہ تعلقات عامہ (آئی ایس پی آر) کے مطابق چیف آف آرمی سٹاف جنرل سید عاصم منیر نے لاہور کا دورہ کیا اور اس موقع پر انہوں نے صوبائی ایپکس کمیٹی کے اجلاس میں شرکت کی۔

آئی ایس پی آر کے مطابق صوبائی ایپکس کمیٹی کے اجلاس میں نگران وزیر اعلیٰ پنجاب محسن رضا نقوی بھی شریک ہوئے، اس دوران آرمی چیف کو صوبے کی مجموعی سکیورٹی صورتحال، بشمول بجلی، گیس چوری، ذخیرہ اندوزی اور غیر ملکی کرنسی کی سمگلنگ کے خلاف کریک ڈاؤن کے حوالے سے تفصیلی بریفنگ دی گئی۔

آرمی چیف جنرل سید عاصم منیر نے کہاکہ غیر قانونی معاشی سرگرمیوں کے خلاف کارروائیوں کے نتیجے میں پاکستان کو مختلف طریقوں سے ہونے والے معاشی نقصانات سے نجات مل سکے گی۔

اس موقع پر فورم کو خصوصی سرمایہ کاری سہولت کونسل (ایس آئی ایف سی ) اور گرین پنجاب کے اقدامات کی پیشرفت سے بھی آگاہ کیا گیا۔

راولپنڈی اور اسلام آباد سمیت جڑواں علاقوں میں گرچ چمک کے ساتھ بارش ہوئی ہے جس کے بعد موسم خوشگوار ہو گیا ہے۔

شہر اقتدار میں گرچ چمک کے ساتھ بارش کے بعد تیز ہوائیں چل پڑیں جس سے موسم سرد ہو گیا۔ اس کے علاوہ پشاور اور ملحقہ علاقوں میں بارش کی وجہ سے گرمی کی شدت کم ہوئی ہے۔

محکمہ موسمیات نے پیشگوئی کی ہے کہ پنجاب، خیبرپختونخوا، آزادکشمیر اور گلگت بلتستان میں مزید بارش ہو سکتی ہے۔