سولر پینلز کی درآمد  کی آڑ میں اربوں روپے کی منی لانڈرنگ اور اوور انوائسنگ کے معاملے پر سینیٹ خزانہ کمیٹی نے ایف آئی اے کو تحقیقات کرکے رپورٹ پیش کرنے کی ہدایت جاری کر دی۔

 سینٹ کمیٹی خزانہ کے اجلاس کے دوران سینیٹر سلیم مانڈوی والا نے کہا ہے کہ ایف آئی اے بطور تھرڈ پارٹی اسکینڈل میں ملوث افراد کا کھوج لگائے ، کمرشل بینکوں اور ایف بی آر کی ملی بھگت کے بغیر ایسا ممکن نہیں، انہوں نے کہا کہ کمیٹی نے اسکینڈل کو روکنے میں ناکامی پر  کسٹمز حکام کی سرزنش کر دی ۔ خزانہ کمیٹی نے ایف بی آر کو بھی اسکینڈل کی تحقیقات جاری رکھنے کی ہدایت کر دی ۔

  کمیٹی کے رکن  کامل علی آغا نے کہا کہ فیٹف کی نگرانی کے دوران منی لانڈرنگ بہت بڑا اسکینڈل ہے، ڈپٹی گورنر اسٹیٹ بینک نے اسکینڈل میں ملوث بینکوں کو بھی پکڑنے کی حمایت کر دی ، اجلاس کےدوران اسٹیٹ بینک اور ایف بی آر حکام نے ملبہ ایک دوسرے پر ڈال دیا۔

ڈپٹی گورنراسٹیٹ بینک نے کہا کہ ملوث افراد کا احتساب ہونا چاہیے، ایف بی آر حکام  نے بتایا کہ صرف دو درآمدکنندگان  نے 72 ارب روپے سے زیادہ کی رقم بیرون ملک منتقل کی۔ 5سال کے دوران اوورانوائسنگ کے ذریعے69 ارب سے زیادہ کی منی لانڈرنگ ہوئی ، ایف بی آر حکام کا کہنا تھا کہ اگر بینک پہلے ہی ریڈ فلیگ لگا دیتے تو اسکینڈل کو  روکا جا سکتا تھا۔

لاہور  میں پیٹرول پمپ پر آئل ٹینکر میں آگ لگنے سے  متعدد گاڑیاں جل گئیں۔

پنجاب میں غیر معیاری ایوسٹین انجکشن کے درجنوں افراد کے بینائی سے محروم ہونے کے معاملے پر محکمہ صحت پنجاب نے مزید نو ڈرگ انسپکٹرز اور ڈپٹی ڈرگ کنٹرولرز کو معطل کر دیا۔

نوٹیفکیشن کے مطابق لاہور سے عزیز بھٹی ٹائون کے ڈرگ انسپکٹر ، وزیرآباد سے ڈپٹی ڈرگ کنٹرولر اور منچن آباد سے ڈرگ انسپکٹر، چکوال ڈسٹرکٹ سے ڈپٹی ڈرگ کنٹرولر اور ڈرگ انسپکٹر ، اٹک سے ڈپٹی ڈرگ کنٹرولر اور بہاولپور سے ڈرگ انسپکٹر کو معطل کیا گیا ۔

محکمہ صحت پنجاب کےنوٹیفکیشن کے مطابق تمام ڈرگ انسپکٹرز کو نظم وضبط اور احتساب ایکٹ کے تحت معطل کیا گیا ہے، معطل کیے گئے ڈرگ انسپکٹرزکی تعداد 20  ہو گئی ہے۔

حکومت نے ایرانی تیل کے سمگلروں کے خلاف سخت کریک ڈاؤن کے احکامات جاری کر دیئے۔

نگران  وزیر داخلہ سرفراز بگٹی نے کہا ہے کہ جنوری سے اب تک 24 خود کش حملے ہوئے جن میں سے 14 افغانیوں نے کئے۔

 میڈیا کو بریفنگ دیتے ہوئے وزی داخلہ نے کہا کہ  ہر پاکستانی کی فلاح و بہبود اور تحفظ ہمارے لئے سب سے مقدم ہے، ملک میں غیرقانونی طور پر مقیم افراد کو یکم نومبر تک اپنے ملکوں میں چلے جانے کا کہا ہے۔  قانون نافذ کرنے والے ادارے رضا کارانہ طور پر واپس نہ جانے والوں کو ڈی پورٹ کریں گے۔

انہوں نے مزید بتایا کہ غیرقانونی طور پر مقیم افراد کی املاک اور کاروبار کی نشاندہی کی جائے گی، ہم ایک ہیلپ لائن نمبر بنا رہے ہیں، غیر قانونی مقیم افراد کی اطلاع دینے والے کا نام کسی سے شیئر نہیں کیا جائے گا۔ وزارت داخلہ میں اس سلسلے میں ٹاسک فورس کا قیام عمل میں لایا گیا ہے، جعلی شناختی کارڈ رکھنے والوں  کے ڈی این اے ٹیسٹ کئے جائیں گے۔

، وزیر داخلہ نے کہا کہ  افغانستان سے پاکستان پر حملے ہوتے ہیں، پاکستان واحد ملک ہے جہاں بغیر پاسپورٹ، ویزے کے لوگ آجاتے ہیں۔ بارہ ربیع الاول کو ہنگومیں حملہ کرنے والے دہشتگرد افغانی تھے، افغان شہریوں کے حملوں میں ملوث ہونے کے تمام شواہد موجود ہیں۔

سرفراز بگٹی نے کہا کہ کسی کو بندوق کے زور پر اپنا ایجنڈا مسلط کرنے کی اجازت نہیں دی جاسکتی، اسلام کا نام لیکر ریاست پر حملہ آور گروہوں کو سختی سے کچلا جائے گا۔

 پشاور ہائیکورٹ نے تھری ایم پی او کے تحت گرفتارپی ٹی آئی کے مقامی رہنما عرفان سلیم کو رہا کرنے کا حکم جاری کر دیا۔

 پی ٹی آئی کے مقامی رہنما کے کیس کی سماعت چیف جسٹس پشاور ہائیکورٹ جسٹس محمد ابراہیم کی سربراہی پر مشتمل دو رکنی بینچ نے کی۔

  چیف جسٹس نے ڈپٹی کمشنر پشاور سے استفسار کیا کہ عدالتی احکامات کے باوجود درخواست گزار کو کیوں گرفتار کیا گیا، ڈی سی اورپولیس کیا اتنے طاقتور ہیں کہ عدالتی احکامات پر عمل نہیں کرتے۔

 ڈپٹی کمشنر نے  بتایا کہ عدالتی احکامات کا پتہ نہیں تھا، پولیس کے امن وامان خراب ہونے کے مراسلے پر عرفان سلیم کو گرفتار کیا تھا۔

 چیف جسٹس نے برہمی کا اظہار کرتے ہوئے کہا کہ عدالت کے احکامات پرعمل نہیں ہوا تو پھر ہمیں کرسی پر بیٹھنے کا کوئی حق نہیں، ڈپٹی کمشنر نے عدالتی احکامات کو بھی ردی کی ٹوکری میں پھینک دیا۔

عدالت نے عرفان سلیم کو رہا کرنے کا حکم دیدیا جبکہ چیف سیکرٹری اور آئی جی پولیس کو طلب کرتے ہوئے کیس کی سماعت ملتوی کر دی۔

۔

سکیورٹی اداروں نے 221 مبینہ دہشتگردوں سے ایک ارب روپے کی خطیر رقم برآمد کرنے کا دعویٰ کیا ہے۔

 ایک رپورٹ کے مطابق گزشتہ پانچ سال کے دوران خیبر پختونخوا میں ایک ہزار732 مبینہ دہشتگرد وں کو  گرفتار کیا گیا ، جن کیخلاف  مالی معاونت کے کیسز درج کیے گئے۔ 194دہشتگردوں کو مالی معاونت کے جرم میں سزا ہوئی ہے۔

900 کیسز میں دہشتگردوں کو سزا ہوچکی ہے ،233ملزمان کو عدالتوں نے ناکافی شواہد کی بنیاد پربری کردیا، 10 مبینہ دہشتگرد کالعدم تنظیموں کی مالی معاونت کرتے ہوئے پائے گئے، مشترکہ آپریشن سی ٹی ڈی، کسٹم، ایف آئی اے اور حساس اداروں نے شروع کیا تھا۔

ملک بھر میں نان کسٹم پیڈ گاڑیوں کے خلاف آپریشن کا فیصلہ کر لیا گیا۔

 رپورٹس کے مطابق اب تک ایک لاکھ سے زائد گاڑیاں پولیس کے پاس باضابطہ رجسٹرڈ کی گئی ہیں،ایف بی آر اوردیگر سرکاری اداروں کے ذرائع سے ملنے والی معلومات کے مطابق نان کسٹم پیڈ گاڑیوں کیخلاف آپریشن کا فیصلہ آرمی چیف جنرل عاصم منیر کے حالیہ دورہ پشاور کے دوران کیا گیا۔

آپریشن کے فیصلے کے بعد متعلقہ اداروں نے ملک میں غیرقانونی طریقے سے داخل ہونے والی گاڑیوں کا ڈیٹا نکال لیا ہے ۔اس وقت دو سے تین لاکھ گاڑیاں بغیررجسٹریشن کے چل رہی ہیں۔ ان کو ریگولرائز کرنے سے سرکاری خزانے میں بیس ارب روپے سے زائد کا ریونیو آنے کا امکان ہے۔