کراچی (این این آئی) پاکستان کرکٹ ٹیم کے سابق کپتان شعیب ملک نے کہا ہے کہ ورلڈکپ 2023 کیلئے بابر اعظم کو اعتماد دینے کی ضرورت ہے۔

میڈیا سے گفتگو میں شعیب ملک نے کہا کہ پاکستان کرکٹ بورڈ (پی سی بی) نے نوجوان کھلاڑیوں کو پروموٹ کرنے کیلئے سندھ پریمیئر لیگ کو این او سی دیا ہے۔

انہوں نے کہا کہ شاہین شاہ آفریدی، حارث رئوف اور نسیم شاہ کی بولنگ جوڑی بن گئی تھی، بدقسمتی سے اب نسیم شاہ اسکواڈ کا حصہ نہیں ہیں۔

سابق کپتان نے کہاکہ مینجمنٹ کو دیگر بولرز کو بھی موقع دینا چاہیے تھا تاکہ ایڈجسٹ ہو جاتے، ہم سب کی امیدیں پاکستان ٹیم کے ساتھ جڑی ہوئی ہیں۔

انہوں نے کہاکہ کپتان بابر اعظم کو اعتماد دینے کی ضرورت ہے، پوری قوم یہی دعا کر رہی ہے کہ پاکستان اچھی کار کردگی دکھائے۔

کرکٹ کے عالمی مقابلے کا آغاز آج بھارت میں ہونے جا رہا ہے، جہاں ہر کوئی اپنی اپنی فیورٹ ٹیموں کو لے کر تبصرے کر رہا ہے وہیں کرکٹ اسٹارز کی جانب سے سیمی فائنلسٹ ٹیموں کے حوالے سے پیشگوئیاں بھی کی جا رہی ہیں۔

قومی کرکٹ ٹیم کے سابق فاسٹ بولر محمد عامر اور آل راؤنڈر عماد وسیم کی جانب سے بھی اپنی سیمی فائنلسٹ ٹیموں کا اعلان کر دیا گیا ہے۔

سابق فاسٹ بولر محمد عامر نے ایک پروگرام میں گفتگو کرتے ہوئے پاکستان، بھارت، انگلینڈ اور آسٹریلیا کو سیمی فائنل میں پہنچنے کے لیے فیورٹ قرار دیا ہے۔

انہوں نے کہاکہ پاکستانی ٹیم کو جب بھی نظرانداز کیا جائے تو وہ شاندار کم بیک کرتی ہے۔

دوسری جانب قومی آل راؤنڈر عماد وسیم نے پاکستان، انگلینڈ، بھارت اور جنوبی افریقا کو فیورٹ قرار دیا ہے کہ یہ سیمی فائنل میں کوالیفائی کر سکتی ہیں۔

دنیا کی 10 ٹیموں کے درمیان کرکٹ ورلڈ کپ 2023 کا آغاز 5 اکتوبر سے ہو رہا ہے۔

 اگلے ڈیڑھ ماہ تک 10 ممالک کے کھلاڑی اس سب سے بڑے انعام کو حاصل کرنے کا خواب دیکھیں گے ، 1975سے 2019  کے دوران 12 بار ورلڈ کپ کے مقابلوں کا انعقاد ہوا ، 6 ٹیموں نے ٹرافی کو اپنے نام کیا، جن میں آسٹریلیا (5 بار)، ویسٹ انڈیز (2 بار)، بھارت (2 بار)، پاکستان (ایک بار)، سری لنکا (ایک بار) اور انگلینڈ (ایک بار) شامل ہیں۔

ٹورنامنٹ جیتنے والی ٹیم کو ورلڈ کپ ٹرافی کا انعام دیا جاتا ہے ، ہوسکتا ہے  آپ کو علم نہ ہو مگر یہ ٹرافی کئی بار تبدیل ہو چکی  ہے ، 1975 سے 1983 تک تمام ورلڈ کپ ایونٹس کا انعقاد انگلینڈ میں ہوا تھا۔

تینوں ایونٹس کو پروڈینشل انشورنس نامی کمپنی نے اسپانسر کیا تھا اور اسی وجہ سے ٹرافی کو پروڈینشل کپ ٹرافی کا نام دیا گیا، یہ ومبلڈن ٹینس ایونٹ کی ٹرافی سے ملتی جلتی ٹرافی تھی اور اب یہ لارڈز کے کرکٹ میوزیم میں موجود ہے،1987 کو پہلی بار یہ ٹورنامنٹ برصغیر یعنی پاکستان اور بھارت میں منعقد ہوا۔

ریلائنس انڈسٹریز نے اس ورلڈکپ کو اسپانسر کیا اور ایونٹ کے لیے گولڈ پلیٹڈ ٹرافی تیار کی گئی جس پر ہیرے جڑے تھے اور اسے ریلائنس ورلڈ کپ کا نام دیا گیا، اس ٹرافی کی تیاری پر اس زمانے میں 6 لاکھ بھارتی روپے خرچ ہوئے جو موجودہ وقت کے 80 لاکھ بھارتی روپوں کے برابر ہیں، اسے اب تک کی ڈیزائن کی گئی سب سے خوبصورت ورلڈکپ ٹرافی بھی تصور کیا جاتا ہے۔

بھارت کے اسٹار کرکٹر ویرات کوہلی ورلڈ کپ کے دوران میچ کی ٹکٹیں مانگنے والوں سے پریشان ہو گئے ہیں۔

ویرات کوہلی نے سماجی رابطے کی سائٹ انسٹاگرام پر ایک اسٹوری میں شائقین کرکٹ کو مشورہ دیا ہے کہ جن لوگوں کو ٹکٹیں نہیں مل سکیں وہ گھر میں بیٹھ کر میچ کو انجوائے کریں۔

ویرات کوہلی نے لکھا کہ میں اپنے دوستوں سے درخواست کرتا ہوں کہ مجھ سے ٹکٹ کا تقاضا نہ کریں۔

ویرات کوہلی کی اسٹوری پر ان کی اہلیہ انوشکا شرما نے بھی انسٹاگرام پر لکھا کہ پلیز اگر کوہلی کی جانب سے جواب نہ ملے تو مجھ سے بھی ٹکٹ لے کر دینے کی درخواست نہ کی جائے۔