صوبہ بلوچستان میں 84 دینی مدارس کا انتظام افغان شہریوں کے پاس ہونے کا انکشاف ہوا ہے جن میں زیر تعلیم طلبا کی تعداد 8500 ہے، حکومت نے اس حوالے سے بڑا فیصلہ کر لیا ہے۔

ذمہ دار ذرائع کے مطابق چند دن قبل بلوچستان کی ایپکس کمیٹی کے اجلاس میں مدارس کے حوالے سے اہم فیصلے کئے گئے ہیں۔ ذرائع کے مطابق قانون نافذ کرنے والے حکام نے اجلاس کو بتایا گیا کہ بلوچستان میں اس وقت205 مدارس کام کر رہے ہیں اوران تمام مدارس کی جیو ٹریکنگ کی گئی ہے۔

ایپکس کمیٹی اجلاس کے شرکا کو بتایا گیا کہ ان مدارس میں سے 121 مدارس میں 8 ہزار طالبعلم زیر تعلیم ہیں جبکہ 84 مدارس کا انتظام افغان شہریوں کے پاس ہے جن میں زیر تعلیم طلبا کی تعداد 8500 ہے۔

کمیٹی نے فیصلہ کیا ہے کہ جن مدارس کا انتظام افغانیوں کے پاس ہے وہ پاکستانیوں کو سونپا جائے گا۔

اجلاس کو بتایا گیا کہ ان مدارس کے اکائونٹس کی جانچ پڑتال اور مہاجر کیمپس کے ساتھ رابطوں کی سکروٹنی بھی کی گئی ہے۔

ایپکس کمیٹی کو یہ بھی بتایا گیا کہ مدارس کے نصاب کو نفرت انگیز مواد سے پاک کیا گیا ہے۔

اسلام آباد: ویزہ اور پاسپورٹ کے بغیر افغان شہریوں کا پاکستان میں داخلہ بند کر دیا گیا۔ یہ فیصلہ نگران وزیراعظم انوارالحق کاکڑ کی زیرصدارت ایپکس کمیٹی اجلاس میں کیا گیا۔

نگران وزیرداخلہ سرفرازبگٹی نے پریس کانفرنس کے دوران اجلاس کے فیصلوں سے آگاہ کرتے ہوئے بتایا کہ 10 اکتوبر 2023 سے پاکستان اورافغانستان بارڈر سے نقل و حرکت کمپیوٹرائزڈ شناختی کارڈ پر ہو گی جبکہ یکم نومبر 2023 سے نقل و حرکت کی اجازت صرف پاسپورٹ اور ویزا پر دی جائے گی ۔

اجلاس میں کہاگیاکہ یکم نومبر 2023 سے غیر قانونی طورپر مقیم غیرملکیوں کے کاروبار /جائیدادیں ضبط کر لی جائیں گی اور غیر قانونی کاروبار کرنے والوں اور ان کے سہولت کاروں کے خلاف سخت کاروائی کی جائے گی۔اجلاس میں فیصلہ کیاگیاکہ یکم نومبر 2023 کے بعد پاکستان میں مقیم غیر قانونی غیر ملکیوں کورہائش فراہم کرنے یا سہولیات فراہم کرنے والے کسی بھی پاکستانی شہری یا کمپنی کے خلاف سخت قانونی کاروائی کی جائے گی۔