پنجاب کی نگران حکومت نے سابق وزیراعظم نوازشریف کی العزیزیہ ریفرنس میں سزا معطل کر دی ہے۔

سابق وزیراعظم و قائد پاکستان مسلم لیگ ن نوازشریف نے پنجاب حکومت کو درخواست کی تھی کی ان کی سزا معطل کی جائے۔

نوازشریف نے سزا معطل کرنے کی درخواست اسلام آباد ہائی کورٹ کے فیصلے کی روشنی میں دی تھی۔

نوازشریف کی درخواست پر پنجاب کی نگران کابینہ نے مسلم لیگی قائد کی سزا معطل کرنے کی منظوری دے دی ہے۔

سابق وزیراعظم و قائد پاکستان مسلم لیگ ن نوازشریف نے ایون فیلڈ اور العزیزیہ ریفرنس میں سزا کے خلاف اپیلوں کی بحالی کے لیے اسلام آباد ہائیکورٹ میں درخواستیں دائر کر دی ہیں۔

نوازشریف کے وکیل امجد پرویز ایڈووکیٹ نے اسلام آباد ہائیکورٹ میں نوازشریف کی جانب سے درخواستیں دائر کیں۔

نوازشریف نے اسلام آباد ہائیکورٹ سے استدعا کی ہے کہ اپیلوں کو بحال کرتے ہوئے میرٹ پر دلائل سنے جائیں اور پھر فیصلہ سنایا جائے۔

واضح رہے کہ عدالت نے سابق وزیراعظم نوازشریف کو ایون فیلڈ اور العزیزیہ ریفرنس میں سزا سنائی ہے اور انہیں 10 سال تک کسی بھی عوامی عہدے کے لیے نااہل قرار دیا ہے۔

اس سے قبل نوازشریف نے 21 اکتوبر کو وطن واپسی پر اسلام آباد ایئرپورٹ پر اپنے وکلا سے مشاورت کی تھی اور اپیلوں کی بحالی کے لیے درخواستوں پر دستخط بھی کیے تھے۔