اسرائیل اور حماس کے درمیان بڑھتی ہوئی کشیدگی کے تناظر میں امریکا نے دنیا بھر میں اپنے شہریوں کے لیے الرٹ جاری کر دیا ہے۔

امریکی محکمہ خارجہ کے ترجمان میتھیو ملر نے کہا ہے کہ امریکی شہریوں کے خلاف دہشتگرد حملے، مظاہرے یا پرتشدد کارروائیاں ہو سکتی ہیں۔

انہوں نے کہا کہ امریکا نے زور دیا ہے کہ غزہ میں امداد کی ترسیل کے دوران حملے نہیں ہونے چاہئیں۔

ترجمان امریکی محکمہ خارجہ نے کہا کہ پاکستان سمیت تمام ریاستیں پناہ گزینوں کے ساتھ روا سلوک پر اپنی ذمہ داریوں کو برقرار رکھیں۔

یاد رہے کہ اسرائیل اور فلسطین کی مزاحمتی تنظیم حماس کے درمیان جاری کشیدگی کے بعد اب تک شہید ہونے والے فلسطینیوں کی تعداد 3900 ہو گئی ہے جبکہ ساڑھے 13 ہزار زخمی ہیں۔

امریکا نے کہا ہے کہ واشنگٹن انسداد دہشت گردی کے لیے پاکستان کے ساتھ کثیرالجہتی فورمز پر تعاون جاری رکھے گا۔

امریکی محکمہ خارجہ کے ترجمان میتھیو ملر نے پریس بریفنگ دیتے ہوئے کہاکہ انسداد دہشت گردی کے لیے پاکستان سے تعاون کیا جا رہا ہے۔

انہوں نے کہاکہ پُرتشدد انتہا پسندی کے مقابلے کی خاطر پاکستان کی کوششوں میں بہتری کے لیے تعاون جاری رکھا جائے گا۔

میتھیو ملر نے پاکستان میں ہونے والے خود کش حملے کی مذمت کی۔ اس کے علاوہ کینیڈا میں سکھ رہنما کے قتل پر ان کا کہنا تھا کہ کینیڈا کی حکومت کے ساتھ اس معاملے پر قریبی رابطے میں ہیں۔

انہوں نے کہاکہ ہردیپ سنگھ کے قتل کے معاملے پر بھارتی حکومت پر زور دیا ہے کہ وہ تحقیقات میں کینیڈا کے ساتھ تعاون کرے۔