لاہور کی انسداد دہشت گردی عدالت نے پاکستان مسلم لیگ ن کی ترجمان مریم اورنگزیب، سینیئر لیگی رہنما جاوید لطیف اور دیگر کو انتشار انگیز گفتگو کرنے کے کیس میں طلب کر لیا ہے۔

انسداد دہشتگردی عدالت کی جج عبہر گل خان نے کیس کی سماعت کی، اس دوران ایم ڈی پی ٹی وی سہیل خان، پروڈیوسر راشد بیگ کی جانب سے ذیشان غنی ایڈووکیٹ پیش ہوئے جبکہ مریم اورنگزیب اور جاوید لطیف کی جانب سے کوئی وکیل پیش نہ ہوا۔

عدالت نے ترجمان مسلم لیگ ن مریم اورنگزیب اور جاوید لطیف سمیت دیگر ملزمان کو 14 اکتوبر کو دوبارہ طلب کر لیا اور سماعت ملتوی کر دی۔

واضح رہے کہ ملزمان کے خلاف تھانہ گرین ٹاؤن میں مقدمہ درج ہے، پولیس کی جانب سے ملزمان کو کیس سے ڈسچارج کرنے کی استدعا کی گئی تھی جو مسترد ہو چکی ہے۔