جماعت اسلامی پاکستان نے بجلی کے بلوں میں اضافی ٹیکسوں کے خلاف سپریم کورٹ سے رجوع کر لیا ہے۔

بجلی کے بلوں میں اضافی ٹیکسوں کے خلاف عدالت عظمیٰ میں دائر ہونے والی درخواست میں وفاق، نیپرا سمیت دیگر کو فریق بنایا گیا ہے۔

جماعت اسلامی کی درخواست میں یہ نکتہ اٹھایا گیا ہے کہ نیپرا ایکٹ کے خلاف بجلی ٹیرف کا تعین نہیں کیا جا سکتا۔ کم نرخ پر بجلی فراہم نہ کرنا آئین پاکستان کی خلاف ورزی ہے۔

درخواست میں موقف اختیار کیا گیا ہے کہ حکومت کی جانب سے بجلی کے بلوں پر ٹیکس بڑھایا جا رہا ہے، دوسری طرف ٹیکسٹائل صنعتیں بجلی کی کمی کے باعث مشکلات کا شکار ہیں۔

درخواست میں کہا گیا ہے کہ فیول پرائس ایڈجسٹمنٹ قانون کے خلاف ہے، آئین میں واضح طور پر درج ہے کہ نیپرا کو بطور ریگولیٹر کوئی پالیسی بنانے کا اختیار نہیں ہے۔

جماعت اسلامی نے کہا ہے کہ اس وقت چونکہ نگران حکومت ہے لہٰذا عدلیہ ہی واحد ادارہ ہے جہاں سے اس معاملے کا نوٹس لے کر اس کو حل کیا جا سکتا ہے۔

ملک میں مہنگائی کی بڑھتی ہوئی شرح اور بجلی کے بلوں میں بے جا ٹیکس لگانے کے خلاف آزادکشمیر بھر میں آج پہیہ جام شٹرڈائون ہڑتال کی جا رہی ہے۔

مظفرآباد، میرپور اور پونچھ ڈویژن میں تمام کاروباری مراکز بند ہونے کے ساتھ ساتھ ٹریفک کا نظام مکمل طور پر معطل ہے جس کے باعث لوگوں کو مشکلات کا سامنا بھی کرنا پڑ رہا ہے۔

آزادکشمیر کے تمام مکاتب فکر نے ایکشن کمیٹی کی جانب سے دی گئی ہڑتال کی حمایت کی ہے۔

آزادکشمیر کے مختلف مقامات پر مرکزی شاہراہوں کو رکاوٹیں کھڑی کر کے بند کیا گیا ہے، صرف ایمبولینسز کو جانے کی اجازت ہے۔

احتجاج کے دوران آزادکشمیر کے مختلف مقامات پر مظاہرین ٹولیوں کی شکل میں جمع ہو کر نعرے بازی کر رہے ہیں۔

امیر جماعت اسلامی آزادکشمیر ڈاکٹر مشتاق نے مظفرآباد میں مظاہرین سے خطاب کرتے ہوئے کہا ہے کہ اس وقت مہنگائی کی وجہ سے ہر شخص پریشان ہے۔