بجلی کمپنیوں کے گریڈ 17سے گریڈ 21 کے افسران کو ماہانہ مفت یونٹس کی فراہمی بند کرنے کی سفارش کی گئی ہے ، کابینہ کمیٹی برائے توانائی کی جانب سے پاور ڈویژن کی سمری پر آئندہ اجلاس میں منظوری دینے کا امکان ہے۔

ذرائع کے مطابق مفت یونٹس کی سہولت ختم کرنے سے سالانہ 6 ارب روپے سے زائد بچت ہو گی۔ گریڈ 17کے افسر کوماہانہ 450مفت یونٹس کے بجائے 15ہزار 858روپے، گریڈ18 کے افسر کو 600 مفت یونٹس کی جگہ 21ہزار996  ، گریڈ 19کے افسر کو  880 مفت یونٹس کے بجائے 37 ہزار594 ،  گریڈ 20 کے افسر کوماہانہ 1100 مفت یونٹس کے  بجائے 46 ہزار 992 روپے اور گریڈ 21 کے افسر کوماہانہ 1300 مفت یونٹس کی جگہ 55 ہزار536 روپے دینے کی سفارش کی گئی ہے۔

ذرائع کا کہنا ہے کہ جنریشن کمپنی کے گریڈ 17کے افسر کو 24ہزار 570 روپے، گریڈ 18کے افسر کو  26ہزار460 ، گریڈ 19 کو 42 ہزار 720 ، گریڈ 20 کو46 ہزار 992 اور  گریڈ 21 کے افسر کو 55 ہزار536 روپے دیئے جائیں گے۔ گریڈ 16تک کے ملازمین کو فی الوقت مفت بجلی کی سہولت جاری رہے گی۔