پاکستان پیپلزپارٹی کے چیئرمین بلاول بھٹو نے کہاہے کہ موسمیاتی تبدیلیوں سے نمٹنا کسی ایک ملک یا پارٹی کی نہیں ، سب کی ذمہ داری ہے۔
پاکستان پیپلزپارٹی ہیومن رائٹس سیل کے تحت ’’ماحولیاتی تبدیلی کے انسانی حقوق پر اثرات” کے موضوع پر اسلام آباد میں ہونے والی کانفرنس سے ویڈیو لنک خطاب میں بلاول بھٹو نے کہا کہ پاکستان میں تباہ کن سیلاب کے بعد موسمیاتی تبدیلی انتہائی اہمیت کاحامل موضوع ہے ۔ یہ چیلنجز پارٹی لائنوں سے بالاتر ہیں ۔ بلاول نے کہا کہ ہم موسمیاتی تبدیلی کے دورسے گزررہے ہیں ، پریشان کن بات یہ ہے کہ پاکستان موسمیاتی بحران کا مرکز ہے ۔ موسمیاتی تبدیلی کے خطرات کو نظر انداز نہیں کیا جا سکتا۔ شمال کے گلیشیئرز خطرناک حد تک پگھل رہے ہیں اور جنوب کی زرخیز زمینیں ریگستان بنتی جارہی ہیں، موسم کی بے ترتیبی فصلوں کو اور سیلاب ہمارے گھروں و املاک کو تباہ کررہا ہے ۔
یہ بحران پہلے سے پسماندگی میں ڈوبے کثیر لوگوں کوپسماندگی کے مزید گہرے گڑھوں میں دھکیل دے گا۔
بلاول نے کہا کہ پاکستان پیپلز پارٹی انسانی حقوق کی علمبردار ہونے کی قابل فخر تاریخ رکھتی ہے۔ آج میں آپ سے التجا کرتا ہوں کہ ان حقوق کے بارے میں بھی اپنی سمجھ کو وسعت دیں۔ انہوں نے کہا کہ شفاف ہوا، پینے کا صاف پانی اور معاشی استحکام اتنے ہی اہم بنیادی انسانی حقوق ہیں جتنا کہ آزادی اظہار، اچھی تعلیم کا وعدہ اور منصفانہ ٹرائل ہے۔
انہوں نے کہا کہ پیپلزپارٹی آب و ہوا کی پالیسیوں کو انسانی حقوق کے ساتھ ہم آہنگ کرناچاہتی ہے۔ہم صرف پالیسیوں کا مسودہ نہیں بنائیں گے بلکہ ہمہ گیر حل بھی بتائیں گے۔
بلاول نے کہا کہ بے آواز کو بااختیار بنانابھی پیپلزپارٹی کے منشور کالازمی جزو ہوگا۔اب کمزور طبقات فیصلوں کی تشکیل اور آگے کا راستہ طے کرنے میں ایک فعال اور اہم کردار ادا کریں گے ۔
ملازمتوں کے ذریعے سبز انقلاب کو آگے بڑھانا بھی ہماری بنیادی پالیسی میں شامل ہوگا۔
بلاول کا کہناتھا کہ ہمیں تعلیم میں سرمایہ کاری کرنی چاہیے ۔ ہمیں ایسے بنیادی ڈھانچے کی ضرورت ہے جو مستقبل کے چیلنجوں سے نمٹنے کے لیے لچکدار ہو۔ ہمیں بین الاقوامی شراکت داری کو فروغ دینا چاہیے کیونکہ موسمیاتی تبدیلی کے خلاف جنگ کسی ایک ملک کی لڑائی نہیں بلکہ اجتماعی کوشش ہے۔
بلاول نے کہا کہ ہم صرف بیان بازی نہیں کرتے۔ ہمارے پاس پاکستان کے لوگوں کو دکھانے کے لیے ایک مثال موجود ہے کہ ہم نے پروجیکٹس کی شکل میں اس بیان بازی کو کہاں تک پہنچایا ہے۔
ہمارے پاس سندھ کا ‘اپنی زمین اپنا مکان’ پروگرام ہے جو موسمیاتی آفات کی وجہ سے تباہ ہونے والے گھروں کی تعمیر نو کر رہا ہے۔
ہم خواتین کو بااختیار بنانے کے لیے نہ صرف گھر فراہم کر رہے ہیں بلکہ زمین کی ملکیت بھی دے رہے ہیں۔
کانفرنس میں پی پی پی ہیومن رائٹس سیل کے صدر فرحت اللہ بابر، سابق وفاقی وزیر برائے موسمیاتی تبدیلی و نائب صدر پی پی پی پی سینیٹر شیری رحمن، جنرل سیکریٹری ہیومن رائٹس سیل پی پی پی سیدہ ملائکہ رضا، جنرل سیکریٹری پی پی پی پنجاب سید حسن مرتضیٰ نے شرکت کی۔ کانفرنس سے مرکزی سیکرٹریٹ انچارج سبط الحسن بخاری، ایڈووکیٹ شکیل عباسی نے بھی خطاب کیا۔