اسرائیل کے وزیر اعظم بنیامن نیتن ہاہو نے ایک ٹیلی ویژن خطاب میں کہا ہے کہ اسرائیلی افواج غزہ میں داخل ہو گئی ہیں اور کمانڈر پوری غزہ پٹی میں تعینات ہیں۔

میڈیا رپورٹس کے مطابق بنیامن نیتن یاہو نے حماس کے ہاتھوں یرغمال بنائے گئے اسرائیلیوں کے اہل خانہ سے ملاقات کی، جنھوں نے غزہ پر حملوں میں شدت آنے پر تشویش کا اظہار کیا ہے۔

اسرائیلی وزیراعظم نے کہا کہ مغویوں کی بازیابی فوج کے اہداف کا ایک لازم حصہ ہے۔

غزہ شہر پر پمفلٹ گرائے گئے ہیں جس میں رہائشیوں کو متنبہ کیا گیا ہے کہ یہ علاقہ اب ایک میدان جنگ ہے اور انھیں جنوب کی طرف نقل مکانی کر لینی چاہیے ۔

دوسری جانب دنیا کے مختلف ممالک میں گزشتہ 24 گھنٹوں کے دوران غزہ کی حمایت میں مظاہرے کیے گئے۔

ترکی میں صدر رجب طیب اردوغان نے استنبول میں فلسطینیوں کے حامی ایک بڑے مظاہرے میں شرکت کی۔

ترک صدر نے جہاںاسرائیل کو قابض قرار دیا وہیں غزہ پر تشدد کا ذمہ دار مغربی ممالک کو ٹھہرایا۔