بھارتی ریاست سکم میں موسلا دھار بارشوں کے نتیجے میں ڈیم ٹوٹ گیا اور سیلابی ریلے نے فوجی کیمپ میں داخل ہوکرتباہی مچادی۔
عالمی خبر رساں ادارے کے مطابق بھارتی وزارت دفاع نے بتایا کہ ریاست سکم میں بادل پھٹنے (Cloud Burst) سے ہونے والی تباہ کن بارش میں ڈیم ٹوٹ گیا اورسیلابی ریلا چین کی سرحد کے نزدیک فوجی کیمپ سے ٹکرا گیا۔
بھارتی وزارت دفاع کے ترجمان کے مطابق سیلابی ریلے سے فوجی تنصیبات کو نقصان پہنچا اور 23 اہلکار لاپتا ہوگئے جن کا اب تک سراغ نہیں مل سکا ۔
ہر گزرتے لمحے کے ساتھ ان کے زندہ ملنے کے امکانات معدوم ہوتے جا رہے ہیں۔
سیلابی ریلے میں گاڑیاں اور کئی سڑکیں تک بہہ گئی ہیں اور پورے علاقے میں بجلی منقطع ہوگئی۔ ریاستی حکومت نے ایمرجنسی نافذ کردی گئی ہے تاہم خراب موسم کے باعث اکثر علاقوں میں امدادی کام کا آغاز نہ ہوسکا۔

مقبوضہ کشمیر کے ضلع راجوڑی میں نامعلوم افراد کی جانب سے بھارتی فوج پر حملہ کیا گیا ہے جس کے نتیجے میں 3 اہلکار شدید زخمی ہو گئے ہیں۔

بھارتی میڈیا نے بتایا ہے کہ فوجی اہلکار راجوڑی میں معمول کی گشت پر تھے کہ اچانک نامعلوم مسلح افراد نے ان پر دھاوا بول دیا۔ فائرنگ کے دوران زخمی ہونے والے 3 اہلکاروں کو ہسپتال منتقل کر دیا گیا ہے۔

مقبوضہ کشمیر فوجی چھائونی میں تبدیل ہونے کے باوجود حملہ آوروں نے کامیابی سے کارروائی کی اور موقع سے فرار ہونے میں کامیاب ہو گئے۔

عینی شاہدین نے بتایا ہے کہ حملہ آوروں نے بھارتی فوج کے اہلکاروں کو اسلحہ نکالنے کا موقع تک نہیں دیا۔

زخمی ہونے والے اہلکاروں کی ہسپتال میں حالت نازک ہے اور ہلاکتوں کا خدشہ ظاہر کیا جا رہا ہے۔