نگران وزیراطلاعات بلوچستان جان اچکزئی کا کہناہے کہ آرمی چیف کے ایکشن کے بعد ڈالر کی قدر میں نمایاں کمی آئی ہے، سرحدوں پر سمگلنگ کیخلاف سختی سے نمٹا جائے گا۔
کوئٹہ میں پریس کانفرنس کرتے ہوئے نگراں وزیر جان اچکزئی کا کہنا تھا کہ آرمی چیف کے ایکشن کے بعد ڈالر کی قدر میں نمایاں کمی آئی ہے، ریاست کے اصولی فیصلوں پر سختی سے عمل درآمد کیا جائے گا۔
نگراں وزیر نے کہا کہ وفاق نے غیر قانونی تارکین وطن کو ان کے وطن واپس بھیجنےکا فیصلہ کیا، غیر قانونی طو رپر مقیم تارکین وطن کو واپس جانا ہی ہوگا، ریاست کے سامنے کھڑے ہونے والے کو کچل دیا جائے گا، تمام اقدامات عالمی قوانین کے مطابق اٹھائے جا رہے ہیں۔ جان اچکزئی نے ایک بار پھر کہا کہ سمگلنگ میں ملوث کشتیوں کو سمندرمیں غرق کر دیا جائے گا، اور سرحدوں پر اسمگلنگ کیخلاف سختی سے نمٹا جائے گا، بلوچستان میں بھی اسمگلنگ کیخلاف کارروائیاں جاری ہیں، کوئی بھی سیاسی دباؤ برداشت نہیں کیا جائے گا۔
نگراں وزیراطلاعات کا کہنا تھا کہ اسمگلنگ سےعوام کو فائدہ ہوتا تو بہت سےعلاقے خوشحال ہوتے، اسمگلنگ سے عام آدمی کے روزگار کا کوئی تعلق نہیں۔

کوئٹہ(این این آئی) محکمہ کیو ڈی اے اور محکمہ بی ڈی اے کے ملازمین کے مسائل کےحل کیلئے اعلی سطح پربات چیت کی جائے گی اور کسی کی حق تلفی نہیں ہونے دی جائے گی مو جودہ نگران صوبائی حکومت محدود وسائل کے باوجود ملازمین اور درجہ چہارم مزدوروں کے مسائل کے حل کیلئے کوشاں ہے ان مسائل کے حل کیلئے محکمہ صنعت و حرفت اور محکمہ لیبراینڈ مین پاور کو مزید فعال کریں گے ان خیالات کا اظہار نگران صوبائی وزیر اطلاعات و نشریات جان اچکزئی نے اپنے دفتر میں بلوچستان لیبر فیڈریشن کے صدر خان زمان اور آل پاکستان لیبر فیڈریشن کے صدر سلطان خان کی قیادت میں ملازمین و مزدور رہنمائوں کے نمائندہ وفد سے بات چیت کرتے ہوئے کیا ۔تعارفی سیشن کے بعد مزدور رہنمائوں نے نگران صوبائی وزیر اطلاعات کو محکمہ کیو ڈی اے اور محکمہ بی ڈی اے کے ملازمین کے مسائل کیو ڈی سے نکالے کئے گئے ملازمین کی دوبارہ بحالی کے حوالے سے تفصیلی آگاہی دی اس موقع پر بی ایل ایف کے سیکرٹری جنرل قاسم خان ،عابد بٹ، ملک وحید، جمیل کاسی و دیگر رہنما شریک تھے انہوں نے محکمہ بی ڈی اے ہیڈ آفس میں نیولی ریگولر ملازمین کی 20 روز سے جاری علامتی بھوک ہڑتال اور روزانہ احتجاج کے حوالے سے بتایا کہ محکمہ کی سرد مہری کی وجہ سے بی ڈی اے کے 650 ملازمین اور درجہ چہارم مزدور چھ ماہ سے تنخواہوں سے محروم ہیں غریب ملازمین کو انسانی حقوق کی سنگین خلاف ورزی کا سامنا کرنا پڑ رہا ہے۔ غریب ملازمین کے بچے فاقہ کشی کا شکارہیں اور وہ اس ہٹ دھرمی کیخلاف ریڈ زون میں دھرنے کی تیاری کررہے ہیں کیونکہ چھ ماہ سے نہ تنخواہیں دی جا رہی ہیں اور نہ  ہی  مسئلے کے حل کیلئے کو ئی پیش رفت ہورہی ہے۔ صورتحال انتہائی تشویش ناک ہے اس موقع پر نگران صوبائی وزیر جان اچکزئی نے کہا کہ ملازمین کے مسائل کا حل حکومت کی اولین تر جیح ہے۔ محدود وسائل میں تمام مسائل کے پائیدارحل کیلئے اقدامات اٹھا ئے جا رہے ہیں۔انہوں نے وفد اور مزدوررہنمائوں کو یقین دہانی کرائی کہ محکمہ کیو ڈی اے اور محکمہ بی ڈی اے کے ملازمین کے مسائل گے حل کیلئے اعلی سطح پربات چیت کی جائے گی اور کسی کی حق تلفی نہیں ہونے دی  جائے کی جس پر وفد نے نگران صوبائی وزیر کا شکریہ ادا کیا

کوئٹہ: بلوچستان کے نگراں وزیر اطلاعات جان علی اچکزئی کا کہنا ہے کہ 27 دن کی مہلت ختم ہونے کے بعد افغان باشندوں کو بےدخل کرنے کیلئے طاقت کا استعمال کیا جائے گا۔

جان علی اچکزئی کے مطابق ایپکس کمیٹی کے فیصلے کے مطابق بلوچستان میں دولاکھ 70 ہزار غیر قانونی طور پر رہنے والے افغان باشندوں کو بے دخل کیا جائے گا۔ بلوچستان میں پانچ لاکھ 84 ہزارافغان باشندوں میں سے 3 لاکھ 31 ہزارجسٹرڈ ہیں۔

کوئٹہ پریس کلب میں پریس کانفرنس کرتے ہوئے ہوئے نگران صوبائی وزیر اطلاعات جان اچکزئی نے کہا کہ قومی مفاد میں غیر ملکیوں کو بے دخل کرنے کا فیصلہ کیا گیا ہے۔

انہوں نے کہا کہ ملک میں دہشگردی کے واقعات میں افغانی ملوث ہیں  غیر قانونی طور پرآنے والوں کے ساتھ دہشگردی بھی آتی ہے۔ جنوری سے اب تک 24 بم حملے ہوئے جن میں سے 14 میں افغان باشندے ملوث تھے ۔

انہوں نے کہا کہ پاکستان میں رجسٹرڈ افغان باشندوں کی تعداد 3 لاکھ 31 ہزار ہے ، 5 لاکھ 84 ہزارافغان باشندوں میں سے 2 لاکھ 70 ہزار غیر قانونی طور پر مقیم ہیں ۔

جان اچکزئی نے مزید بتایا کہ دس اکتوبر کو کوئٹہ میں ایپکس کمیٹی کا دوسرا اجلاس ہوگا۔

ان کا مزید کہنا تھا کہ پاکستان کو کمزور ریاست کے طور پر نہ سمجھا جائے ، ہم کسی قسم کا دباؤ برداشت نہیں کریں گے۔

حکومت کے فیصلے کے بعد نادرا نے افغانستان سے آنے والوں کے لیے رفیوجی کارڈ بنانا بند کر دیئے ہیں۔

ترجمان نادرا کا کہنا ہے کہ رفیوجی کارڈ کی بندش کے بعد اب کوئی بھی نیا افغان مہاجر کے طور پر رجسٹر نہیں ہوسکتا۔ترجمان نے کہا کہ جن افغانیوں کے پاس رفیوجی کارڈزتھے، ان کی ویلیڈیشن بھی مارچ سے بند ہے۔