بنگلا دیش کی حکومت نے سابق وزیراعظم خالدہ ضیا کو علاج کے لیے بیرون ملک جانے سے روک دیا ہے۔

غیرملکی میڈیا رپورٹس کے مطابق بنگلا دیش کی سابق وزیراعظم خالدہ ضیا کی عمر 78 برس ہے اور وہ جگر، سانس اور ذیابیطس کی بیماریوں میں مبتلا ہیں۔ اس کے علاوہ انہیں جوڑوں اور گھٹنوں میں بھی تکلیف ہے۔

بنگلا دیش کی نیشلسٹ پارٹی نے خالدہ ضیا کو بیرون ملک جانے سے روکنے کے حکومتی فیصلے کو انتقامی کارروائی قرار دے دیا ہے۔

بنگلا دیشی وزیراعظم حسینہ واجد اور اپوزیشن رہنما خالدہ ضیا سخت سیاسی حریف ہیں اور ملکی سیاست میں دونوں کا اہم کردار ہے۔

خالدہ ضیا کو 2008 میں کرپشن کے الزام میں 17 سال قید کی سزا سنائی گئی تھی۔ گھر پر نظر بندی سے قبل انہوں نے 2 سال جیل میں گزارے۔ وہ خود پر لگائے گئے تمام الزامات کو مسترد کر چکی ہیں۔