روس کے صدر ولادیمیر پوٹن نے آزاد فلسطینی ریاست کے قیام کی حمایت کرتے ہوئے اسرائیل اور حماس کے درمیان جھڑپوں میں ثالثی کی پیشکش کر دی ہے۔
غیرملکی میڈیا کے مطابق روس کے صدر ولادیمیرپوٹن نے کہا ہے کہ فریقین کو مذاکرات کی میز پر آنا چاہیے، ہم ثالثی کا کردار ادا کرنے کو تیار ہیں، انہوں نے فوری طور پر دوطرفہ کشیدگی کو کم کرنے کا بھی مطالبہ کیا۔
روسی صدر نے امید ظاہر کی کہ فریقین جنگ کو طول دینے کے بجائے سب کے لیے قابل قبول امن مذاکرات کی طرف ضرور آئیں گے۔
ولادیمیرپوٹن نے کہا کہ وقت کی ضرورت ہے کہ اسرائیل اور حماس کے درمیان جنگ کو روکا جائے ورنہ اس کا اثر عالمی صورتحال پر بھی پڑے گا۔
انہوں نے مزید کہا کہ ایک مکمل آزاد ریاست فلسطین کے عوام کا حق ہے، کیوں کہ جس سرزمین پر وہ رہ رہے ہیں وہ تاریخی طور پر ان ہی کی ہے۔
