لاہور( این این آئی )سابق وزیر اعلیٰ پنجاب حمزہ شہباز سے پاکستان مسلم لیگ (ن) کے سینئر رہنما سید حشمت علی شاہ نے ان کے دفتر میں ملاقات کی جس میں پارٹی قائد نواز شریف کی وطن واپسی کے موقع پر استقبال کی تیاریوں کے حوالے سے مشاورت کی گئی ۔
حمزہ شہباز نے کہا کہ عوام وطن واپسی پر اپنے محبوب لیڈر نواز شریف کا فقید المثال استقبال کرکے نئی تاریخ رقم کریں گے ۔
سید حشمت علی شاہ نے کہا کہ ہر عمر اور ہر طبقے کے لوگ ترقی کے ضامن سمجھے جانے والے لیڈر نواز شریف کے پرتپاک استقبال کے لئے بے چین ہیں ۔
عوام جان چکے ہیں کہ اگر کوئی لیڈر ملک کومنجدھار سے نکال سکتا ہے تو وہ صرف نواز شریف ہے ۔
انہوں نے کہا کہ نواز شریف آج بھی پاکستان کی سیاست کا محور ہیں ، نواز شریف کی وطن واپسی سے بہت سے نام نہاد سیاسی رہنمائوں کی مقبولیت کے بت پاش پاش ہو جائیں گے۔
انہوں نے کہا شاہدرہ کے کارکنان اور عوام اپنے لیڈر کا فقید المثال استقبال کریں گے کیونکہ انہیں معلوم ہے کہ اب ملک کو دوبارہ نئی سمت ملنے والی ہے جس سے ان کی زندگیوں میں خوشحالی کا دور واپس آئے گا۔
