دنیا کی کسی بھی زبان میں خبریں پڑھنے کے لیے یہاں کلک کریں۔
ڈیرہ اسماعیل خان میں دہشت گردوں نے پولیس کیمپ پر حملہ کردیا جس میں ایک اہلکار کے شہید ہونے کی اطلاع ہے۔
پولیس کے مطابق دہشت گردوں نے ٹول پلازہ کے قریب پولیس کیمپ کو نشانہ بنایا، حملہ آوروں نے جدید ترین ہتھیاروں سے حملہ کیا جبکہ حملے میں دستی بم بھی استعمال کیے گئے۔
پولیس کے مطابق حملے میں پولیس اہلکار کے شہید ہونے کی اطلاع ہے، پولیس کیمپ میں 15 سے 20 پولیس اہلکار موجود تھے۔
پولیس نے بھرپور جوابی کارروائی کی جبکہ تھانوں سے مزید نفری طلب کرلی گئی ہے۔
گوجرانوالہ کے میڈیکل کالج میں زیرتعلیم فلسطین کے 2 طلبہ پر حملہ کیا گیا ہے جس سے وہ زخمی ہو گئے ہیں۔
میڈیا رپورٹس کے مطابق فلسطینی طلبا پر تیز دھار آلے سے حملہ کیا گیا جس کے بعد انہیں ہسپتال منتقل کر کے طبی امداد دی گئی۔
پولیس نے بتایا ہے کہ فلسطینی طلبا کی ساتھی طالبات کے ساتھ کچھ اوباش لڑکے چھیڑ چھاڑ کر رہے تھے، منع کرنے پر فلسطینی طلبا پر دھاوا بول دیا۔
پولیس کے مطابق وقوعے کا مقدمہ درج کر لیا گیا ہے جس میں 6 ملزمان نامزد ہیں اور اب تک 4 کو گرفتار کیا جا چکا ہے۔
ڈی آئی خان(آن لائن) ڈیرہ اسماعیل خان میں ہتھالہ تھانے پر دہشت گردوں کے حملے میں ایک اہل کار جاں بحق اور 2 زخمی ہو گئے۔
پولیس کے مطابق گزشتہ شب نامعلوم دہشت گردوں نے تھانہ ہتھالہ پر بھاری ہتھیاروں اور دستی بموں سے حملہ کیا، جس میں 3 پولیس اہلکار حنیف، سعید ممتاز اور وکیل زادہ شدید زخمی ہو گئے تھے، جنہیں فوری طور پر ڈسٹرکٹ اسپتال ڈیرہ منتقل کیا گیا تھا۔
پیر کی صبح ایک اہل کار دوران علاج زخموں کی تاب نہ لاتے ہوئے جاں بحق ہوگیا۔
پولیس کے مطابق جاں بحق ہونے والے اہل کار کا تعلق ضلع بونیر سے تھا۔ دہشت گردوں کے حملے میں تھانے کا مین گیٹ تباہ ہوگیا جب کہ کافی دیر تک دو طرفہ فائرنگ کے بعد حملہ آور فرار ہونے میں کامیاب ہو گئے۔
صوبہ خیبرپختونخوا کے ضلع ڈیرہ اسماعیل خان (ڈی آئی خان) میں کلاچی پولیس اسٹیشن پر نامعلوم افراد کی جانب سے حملہ کیا گیا ہے۔
پولیس نے بتایا ہے کہ حملے کے موقع پر نامعلوم افراد اور اہلکاروں کے درمیان شدید فائرنگ کا تبادلہ ہوا ہے۔
پولیس نے بتایا ہے کہ حملے کی اطلاع ملتے ہی پولیس کی اضافی نفری کو موقع پر روانہ کر دیا گیا ہے۔
کراچی(این این آئی)کراچی میں انصاف ہائوس کے باہر سیکیورٹی پر تعینات پولیس اہلکاروں پر نامعلوم افراد نے حملہ کر دیا۔
پولیس کے مطابق نامعلوم افراد نے پولیس اہلکاروں کی وردیاں پھاڑ دیں اور اسلحہ چھیننے کی کوشش بھی کی۔
اس واقعے سے متعلق پولیس حکام نے بتایا کہ حملہ آوروں نے گشت پر مامور موبائل پر بھی پتھرائو کیا، مزید نفری آنے پر حملہ آور پتھرائو اور فائرنگ کرتے ہوئے فرار ہو گئے۔
پولیس کے مطابق حملہ آوروں کی تعداد 20 سے 25 تھی، سرچنگ کے دوران 30 بور پسٹل اور 4 رائونڈ برآمد ہوئے، واقعے کی تحقیقات کی جا رہی ہیں، واقعہ ٹیپو سلطان تھانے کی حدود میں پیش آیا۔
پولیس کے مطابق واقعے کا مقدمہ نامعلوم افراد کے خلاف درج کر لیا گیا ہے، مقدمہ تھانہ ٹیپو سلطان میں اے ایس آئی شمعون دانیال کی مدعیت میں درج کیا گیا ہے۔پولیس کے مطابق مقدمہ ہنگامہ آرائی، پولیس اہلکاروں پر حملہ کرنے اور تشدد کی دفعات کے تحت درج کیا گیا ہے۔
درج مقدمے کے متن کے مطابق موٹر سائیکلوں پر سوار 20 سے 25 افراد انصاف ہاس کے باہر آئے، ملزمان نے انصاف ہاس کے باہر نعرے بازی کی، نامعلوم افراد ڈنڈوں، لاٹھیوں اور آتشی اسلحہ سے لیس تھے۔
درج مقدمے کے متن کے مطابق ملزمان نے پولیس اہلکاروں پر پتھرا کیا، ملزمان نے اہلکار عادل الرحمن پر تشدد کیا اور وردی پھاڑ دی، اضافی نفری پہنچنے پر ملزمان موٹر سائیکلوں پر فرار ہو گئے۔درج مقدمے کے متن کے مطابق سرچنگ کے دوران 30 بور پستول اور 4 رائونڈ ملے ہیں۔
مقبوضہ کشمیر کے ضلع راجوڑی میں نامعلوم افراد کی جانب سے بھارتی فوج پر حملہ کیا گیا ہے جس کے نتیجے میں 3 اہلکار شدید زخمی ہو گئے ہیں۔
بھارتی میڈیا نے بتایا ہے کہ فوجی اہلکار راجوڑی میں معمول کی گشت پر تھے کہ اچانک نامعلوم مسلح افراد نے ان پر دھاوا بول دیا۔ فائرنگ کے دوران زخمی ہونے والے 3 اہلکاروں کو ہسپتال منتقل کر دیا گیا ہے۔
مقبوضہ کشمیر فوجی چھائونی میں تبدیل ہونے کے باوجود حملہ آوروں نے کامیابی سے کارروائی کی اور موقع سے فرار ہونے میں کامیاب ہو گئے۔
عینی شاہدین نے بتایا ہے کہ حملہ آوروں نے بھارتی فوج کے اہلکاروں کو اسلحہ نکالنے کا موقع تک نہیں دیا۔
زخمی ہونے والے اہلکاروں کی ہسپتال میں حالت نازک ہے اور ہلاکتوں کا خدشہ ظاہر کیا جا رہا ہے۔
رحیم یار خان (این این آئی)رحیم یار خان میں مبینہ طور پر بچوں کی لڑائی پر درجنوں افراد نے ہوٹل پر دھاوا بول کر ہوٹل کے مالک اور منیجر کو تشدد کا نشانہ بنا دیا، واقعے کی سی سی ٹی وی بھی سامنے آگئی۔
رحیم یار خان کے تھانہ ظاہر پیر کی حدود میں بچوں کی لڑائی میں بڑے بھی کود پڑے جس کے بعد درجنوں افراد نے ہوٹل پر ڈنڈوں اور سوٹوں سے حملہ کردیا۔
مشتعل افراد کی جانب سے ہوٹل پر حملہ کرکے ہوٹل کے مالک اور منیجر کو بھی تشدد کا نشانہ بنایا گیا۔
مشتعل افراد کے ہوٹل پر حملے کی سی سی ٹی وی بھی منظر عام پر آ گئی ہے۔متاثرین کے مطابق پولیس کی جانب سے نہ تو ان کا مقدمہ درج کیا جا رہا ہے نہ کوئی کارروائی کی جا رہی ہے۔
دوسری جانب پولیس نے بتایا کہ واقعہ جمعے کے روز پیش آیا تھا، معاملے سے متعلق مزید تحقیقات کی جا رہی ہیں۔
نئی دہلی (این این آئی)بھارت کے شہر دہلی میں نامعلوم شخص نے خاتون ڈاکٹر پر چھریوں سے کئی مرتبہ وار کر کے زخمی کر دیا۔
بھارتی میڈیا کے مطابق ملزم نے 40 سالہ ڈاکٹر پر کلینک کی عمارت میں سیڑھیوں پر حملہ کیا جس کے نتیجے میں وہ زخمی ہو گئیں اور ان کا علاج جاری ہے۔
بھارتی پولیس کے مطابق خاتون عمارت کے گرانڈ فلور پر کلینک چلاتی ہیں جبکہ پہلی منزل پر ان کی رہائش بھی ہے۔
بھارتی پولیس کے مطابق ملزم حملے کے بعد فرار ہوگیا جس کی تلاش جاری ہے۔واقعے کا مقدمہ اقدامِ قتل کے تحت درج کیا گیا ہے جبکہ ابتدائی طور پر واقعہ ڈکیتی کا نہیں لگتا۔
خیبرپختونخوا کے ضلع لکی مروت میں دہشتگردوں نے جیل، تھانے اور پولیس چوکی پر حملے کیے ہیں جنہیں پولیس نے بروقت جوابی کارروائی کرتے ہوئے ناکام بنا دیا ہے۔
پولیس حکام نے بتایا ہے کہ مسلح دہشتگردوں نے رات کے وقت جیل، تھانے اور پولیس چوکی پر دھاوا بولا۔ اس موقع پر پولیس کے بہادر جوانوں نے حملے ناکام بنا دیے۔
دہشتگردوں نے دھاوا بولتے ہوئے پولیس چوکی پر دستی بم پھینکے جبکہ شدید فائرنگ بھی کی گئی، پولیس اہلکاروں نے جوابی کارروائی کی اور اس دوران دہشتگرد فرار ہونے میں کامیاب ہو گئے۔
اس کے بعد دہشتگردوں کی جانب سے لکی مروت میں تھانے پر دھاوا بولا گیا مگر وہاں پر بھی پسپائی کا سامنا کرنا پڑا۔ جبکہ جیل پر حملے کے دوران بھی دہشت گرد بھاگنے پر مجبور ہوئے۔
سینیئر پولیس آفیسر نے بتایا ہے کہ دوطرفہ فائرنگ میں کوئی جانی نقصان نہیں ہوا، دہشتگردوں کی گرفتاری کے لیے سرچ آپریشن کیا جا رہا ہے۔
بیروت (این این آئی)لبنانی سکیورٹی سروس نے گذشتہ ہفتے بیروت کے شمال میں امریکی سفارت خانے کے داخلی دروازے پر فائرنگ کرنے والے ایک مشتبہ شخص کو گرفتار کرلیا ۔
غیرملکی خبررساں ادارے کے مطابق ایک سکیورٹی ذریعے نے بتایا کہ انفارمیشن ڈویژن (اندرونی سکیورٹی فورسز)نے امریکی سفارت خانے کی عمارت پر فائرنگ کرنے والے شخص کو گرفتار کیا ہے۔
سکیورٹی ذرائع کے مطابق فوجی عدالت کے سرکاری کمشنر جج فادی اکیکی نے نوجوان سے اس کے اعمال کے پس منظر اوراس کے ساتھیوں کے بارے میں پوچھ گچھ جس نے کوئی اضافی تفصیلات فراہم نہیں کیں۔20 ستمبر کی رات بیروت کے شمال میں واقع علاقے عوکر میں امریکی سفارت خانے کے داخلی دروازے پر فائرنگ کی گئی جس کے نتیجے میں کوئی جانی نقصان نہیں ہوا۔
لبنان کی فوجی عدلیہ نے واقعے کی تحقیقات شروع کردی ہیں۔ابتدائی تحقیقات میں یہ بھی معلوم ہوا کہ گذشتہ ہفتے ایک سکیورٹی ذرائع نے اے ایف پی کو اطلاع دی تھی شوٹر نے سفارت خانے کی طرف 15 گولیاں چلائیں، جن میں سے کئی اس کے آہنی گیٹ سے لگیں۔
امریکی سفارت خانے کے احاطے کے ارد گرد سکیورٹی کے فول پروف انتظامات کئے گئے ہیں۔ سفارت خانے کے اطراف میں فوج کی بھاری نفری تعینات رہتی ہے۔یہ فائرنگ 1984 میں عوکر میں سفارت خانے کی عمارت کو نشانہ بنانے والے کار بم حملے کی 39 ویں برسی کے موقع پر ہوئی، جس میں 11 افراد ہلاک اور درجنوں زخمی ہوگئے تھے۔
