سپریم کورٹ آف پاکستان نے بجلی بلوں میں فیول پرائس ایڈجسٹمنٹ کے خلاف درخواستوں پر مزید دلائل طلب کر لیے ہیں۔

چیف جسٹس پاکستان جسٹس قاضی فائز عیسیٰ کی سربراہی میں 3 رکنی بینچ نے فیول پرائس ایڈجسٹمنٹ کے خلاف ایک ہزار 90 درخواستوں پر سماعت کی۔

سماعت کے آغاز پر اٹارنی جنرل نے عدالت سے مہلت مانگی تو چیف جسٹس نے مسترد کردی اور کہا کہ آدھے گھنٹے میں تیاری کر کے دلائل دیں۔

اس موقع پر ایڈیشنل اٹارنی جنرل نے کہاکہ اس کیس میں اٹارنی جنرل کو نوٹس نہیں میں دلائل دینا چاہوں گا تو چیف جسٹس نے دلچسپ مکالمہ کرتے ہوئے کہاکہ اٹارنی جنرل قابل وکیل میں ہم کیسے انہیں نااہل کہہ سکتے ہیں۔

بعدازاں سماعت میں وقفہ کر دیا گیا اور جب دوبارہ سماعت کا آغاز ہوا تو چیف جسٹس فائز عیسیٰ نے کہاکہ بجلی کی قیمتوں کے حوالے سے کیسوں کا ڈھیر لگا ہے، 16 اکتوبر کو دلائل سن کر فیصلہ کریں گے۔

چیف جسٹس نے کہاکہ 16 اکتوبر کو ویڈیو لنک کے ذریعے پیش ہونے کی سہولت نہیں دی جائے گی۔

بعد ازاں سپریم کورٹ کی جانب سے سماعت 16 اکتوبر تک کے لیے ملتوی کر دی گئی۔