وفاقی وزراء  سرفراز بگٹی اور مرتضیٰ سولنگی نے کہا ہے کہ غیرقانونی غیر ملکیوں کو نکالنے کیلئےحکومت پر کوئی دباؤ نہیں ہے۔ 

 نگران وزیر داخلہ سرفراز بگٹی نے  کابینہ اجلاس کے فیصلوں پر میڈیا بریفنگ دیتے ہوئے کہا کہ غیرقانونی افراد کیساتھ کاروبار ،اُنہیں گھر کرائے پر دینے والوں کیخلاف کارروائی ہوگی ایسے پاکستانیوں کے خلاف بھی فارن ایکٹ کے تحت کارروائی کی جائے گی۔

 اس موقع پر نگران وزیر اطلاعات مرتضیٰ سولنگی نے کہا کہ غیر قانونی طور پر مقیم افراد کو اپنے وطن واپس بھیجنے کے لئے ڈیٹا تیار کیا جا رہا ہے، اس تمام عمل کی نگرانی کیلئے ایک خصوصی نظام وضع کیا جائے گا، انخلا کی ڈیڈ لائن میں کوئی توسیع نہیں ہوئی۔

وزیراطلاعات نے بتایا کہ غیر ملکی اور غیر قانونی طور پر مقیم مہاجرین کے انخلا کے لیے وزیراعظم نے ایک ورک پلان کی منظوری دی ہے، جس کے تحت انہیں مرحلہ وار واپس بھیجا جائے گا۔ جن غیر قانونی لوگوں کو واپس بھیجا جا رہا ہے وہ قانونی طریقے سے دوبارہ واپس آ سکتے ہیں۔

نگران وزیرداخلہ سینیٹر سرفراز بگٹی کا کہنا ہے کہ غیر قانونی تارکین وطن کو نکالنے پر کوئی سمجھوتہ نہیں کیا جائے گا۔

اسلام آباد میں پریس کانفرنس کرتے ہوئے وزیر داخلہ سرفراز بگٹی کا کہنا تھا رضاکارانہ طور پر واپس جانے والے تارکین وطن کی حوصلہ افزائی کریں گے لیکن یکم نومبر کے بعد غیرقانونی طور پر پاکستان میں مقیم غیرملکیوں پر سمجھوتہ نہیں ہوگا۔

ان کا کہنا تھا مختلف شہروں میں سینٹرز بنائے گئے جہاں غیر قانونی مقیم تارکین وطن کو رکھا جائے گا۔ ہم نے غیر ملکیوں سے متعلق جیو فینسنگ کر لی ہے، ہمیں معلوم ہے کہ  غیرقانونی تارکین وطن کس گاوں اور کس شہر میں ہیں، کوئی بھی غیرقانونی مقیم افراد کو پناہ دے گاتو سختی سے نمٹیں گے۔

سرفراز بگٹی کا کہنا تھا مہم غیرقانونی مہاجرین سے متعلق ہے قانونی دائرے میں آنے والوں کا مسئلہ نہیں ہے، ویزا لے کر پاکستان آئیں ہم مہمان نوازی کریں گے ہم مہمان نواز ہیں۔

نگران وفاقی وزیر کا کہنا تھا ملک میں سیاسی قیادت کو تھریٹس موجود ہیں، وقت آئے گا کہ اس ملک میں ایک بھی غیر قانونی غیر ملکی نہیں ہوگا۔

ایک سوال کے جواب میں سینیٹر سرفراز بگٹی کا کہنا تھا ناممکن ہے کہ کوئی ڈالر یہاں سے اسمگلنگ کرکے لے کر جائے، افغان مہاجرین فی خاندان واپسی پر 50 ہزار روپے تک کی افغان کرنسی لے جاسکیں گے۔

نگران وزیر داخلہ نے کہا ہے کہ صرف افغان شہریوں کو نکالنے کا تاثر غلط ہے ،حکومت نے تمام غیرقانونی افراد کو ملک سے نکالنے کافیصلہ کیا ہے ۔

سینٹ کی قائمہ کمیٹی برائے داخلہ کو بریفنگ دیتے ہوئے سرفراز بگٹی کا کہنا تھا کہ غیرقانونی طور پر مقیم بہاریوں کے معاملے کو بھی دیکھیں گے۔

دوران اجلاس نگران وزیر داخلہ کا آغا رفیع اللہ سے مکالمہ بھی ہوا جس میں انہوں نے کہا کہ آپ کل وزرت داخلہ آجائیں اس پر بریفنگ دیتے ہیں، کل آپ کو بتائیں گے کہ حکومت کیا کر سکتی ہے اور قانون کیا اجازت دیتا ہے۔

ان کا کہنا تھا کہ ہم نے غیر قانونی طور پر پاکستان میں موجود افراد کو نکالنے کی بات کی تھی لیکن پیغام شائد یہ چلا گیا ہے کہ ہم صرف افغانیوں کو نکال رہے ہیں۔

انہوں نے بتایا کہ ایران سے بھی غیر قانونی طور پر بلوچ پاکستان میں داخل ہو رہے ہیں، حکومت غیر قانونی بلوچوں کو بھی نکال رہی ہے اس سے یہ تاثر جاتاہے کہ یہ لسانی معاملہ ہے حالانکہ یہ لسانی  نہیں بلکہ غیرقانونی آمدورفت روکنے کامعاملہ ہے۔

 کسی بھی ملک میں یہ نہیں ہوتا کہ کوئی غیر قانونی طور پر آکر بیٹھ جائے، البتہ اگر کسی کے پاس رفیوجی  کارڈ ہے یا ویزا ہے تو وہ ہمارا مہمان ہے۔

بعدازاں میڈیا سے گفتگو کرتے ہوئے سرفراز بگٹی نے کہا کہ غیرقانونی افراد کو ملک سے جانے کے لیے دی گئی یکم نومبر کی تاریخ میں توسیع کی تجویززیرغور نہیں اگر ایسا کوئی مشورہ آیا تو تمام اسٹیک ہولڈرز اس پر گفتگو کریں گے۔

۔ ہمیں اس بات کو یقینی بنانا ہے کہ یکم نومبر سے جو بھی اس ملک میں آئے گا تو پاسپورٹ لے کر آئے گا