سعودی عرب نے 25 یونیورسٹیوں میں اعلیٰ تعلیم کے حصول کیلئے پاکستانی طلبا و طالبات کو 600 اسکالر شپس دینے کا اعلان کر دیا۔

پاکستانی طلبہ کو وظائف ڈپلومہ، ڈگری، ماسٹرز اور پی ایچ ڈی کیلئے دیئے جائیں گے، سعودی عرب میں قانونی طور پر مقیم پاکستانی طالب علم اور پاکستان میں مقیم طلبا و طالبات دونوں ان اسکالر شپس کیلئے اہل ہوں گے، 75 فیصد اسکالر شپس پاکستان سے طالب علموں جبکہ 25 فیصد سعودی عرب میں مقیم پاکستانیوں کیلئے ہوں گے۔

 اسکالر شپ حاصل کرنے کے خواشمند طلباء متعلقہ یونیورسٹی کی ویب سائٹ یا آن لائن پورٹل پر براہ راست اپلائی کرسکتے ہیں، تاہم ہر یونیورسٹی کا داخلے کا اپنا معیار و ٹائم فریم ہے، اس لئے طلبا و طالبات کو اپنے متعلقہ مضمون اور کلاس میں داخلے کے حوالے سے سعودی یونیورسٹی سے مدد لینا ہو گی۔

رپورٹ کے مطابق سعودی عرب کی شہزادی نورہ بن عبدالرحمان یونیورسٹی برائے طالبات ریاض اور جامعہ اسلامیہ مدینہ منورہ کے علاوہ تمام یونیورسٹیاں صرف 25 فیصد بین الاقوامی طلباء کو داخلہ دینے کی پابند ہیں۔

 سعودی یونیورسٹیاں پاکستانی طالبعلموں کی جانب سے موصول ہونے والی درخواستوں کو سعودی وزارت تعلیم کو بھیجیں گی جو اسکالر شپس دینے کا حتمی فیصلہ کرے گی، طلبہ اپنی درخواست کی کاپی پاکستانی سفارتخانے کے آفیشل ای میل پر بھی بھیجیں گے۔

ڈگری پروگرام کیلئے درخواست دینے والوں کی عمریں 17 سے 25 سال کے دوران، ماسٹرز کیلئے 30 سال جبکہ پی ایچ ڈی کیلئے 35 سال سے کم ہونی چاہئیں،اسکالر شپ کا اہل ہونے کیلئے ضروری ہے کہ طالبعلم کا کوئی مجرمانہ ریکارڈ نہ ہو، اسے کسی بھی وجہ سے کبھی بھی یونیورسٹی سے بے دخل نہ کیا گیا ہو۔

اسکالر شپ حاصل کرنیوالے طلباء کو دوران تعلیم سعودی عرب میں مفت رہائش اور شادی شدہ طلباء کو ابتدائی 3 ماہ فرنشنگ الاؤنس بھی فراہم کیا جائے گا، سعودی عرب آمد اور واپسی کیلئے مفت ایئر ٹکٹ جبکہ شادی شدہ طلبہ کو اہلخانہ کیلئے مفت طبی علاج کی سہولت فراہم کی جائے گی۔

اسکالرشپ حاصل کرنیوالے طلباء کو یونیورسٹی کیمپسز میں رعایتی نرخوں پر کھانا، کھیلوں اور تفریح کی سہولیات فراہم کی جائیں گی جبکہ زیر کفالت افراد کیلئے سفری اخراجات میں معاونت بھی کی جائے گی،اسکالر شپس حاصل کرنیوالے سائنس کے طلبا و طالبات کو ماہانہ 900 جبکہ آرٹس کے شعبے میں 850 سعودی ریال ادا کرے گی۔