امریکا میں مقیم سکھ کمیونٹی نے بھارتی سفارتخانے کے باہر احتجاج کیا ہے اور اس دوران خالصتان تحریک کی حمایت میں نعرے بازی کی گئی ہے۔

بھارتی سفارتخانے کے باہر ہونے والے احتجاج میں مختلف ریاستوں سے آئے ہوئے افراد نے شرکت کی، اس دوران خالصتان تحریک کی حمایت میں نعرہ بازی ہوتی رہی۔

مظاہرین نے کہا کہ بھارت میں مودی سرکار کی جانب سے سکھوں پر مظالم ڈھائے جا رہے ہیں اس لیے امریکا بھارت پر دبائو ڈالے۔

احتجاجی مظاہرین نے مطالبہ کیا کہ سکھوں کی آزاد ریاست خالصتان کی کھل کر حمایت کی جائے، اس کے علاوہ یہ مطالبہ بھی کیا گیا کہ کینیڈا میں قتل ہونے والے سکھ رہنما ہردیپ سنگھ کے قاتلوں کو انصاف دلوایا جائے۔

خالصتان تحریک کے متحرک رہنما ہردیپ سنگھ کے کینیڈا میں قتل کے بعد سکھ کمیونٹی پور دنیا میں سراپا احتجاج ہے، اب برطانیہ میں بھارتی ہائی کمشنر کو گلاسکو میں قائم گوردوارے میں داخل ہونے سے روک دیا گیا ہے۔

غیر ملکی میڈیا نے بتایا ہے کہ سکھ اپنے رہنما کے قتل کے خلاف بھارتی ہائی کمشنر کے سامنے آ گئے او شدید احتجاج کیا، اس دوران بھارتی ہائی کمشنر کو گوردوارے میں جانے سے روک دیا گیا اور وہ واپس جانے پر مجبور ہوئے۔

واضح رہے کہ کینیڈا میں سکھ رہنما ہردیپ سنگھ کے قتل کے بعد بھارت اور کینیڈا آمنے سامنے ہیں، اور دونوں ممالک نے ایک دوسرے کے سفیروں کو بھی نکال دیا ہے۔

اب امریکا کی جانب سے بھی بھارت پر زور دیا جا رہا ہے کہ وہ سکھ رہنما کے قتل کی تحقیقات میں کینیڈا کے ساتھ تعاون کرے۔