پشاور(این این آئی) سابق گورنر شاہ فرمان کو فلسطینیوں کے حق میں کئے جانے والے احتجاجی مظاہرے میں جانا بھاری پڑ گیا۔
پشاور پریس کلب کے باہر فلسطینیوں کے حق میں پی ٹی آئی نے مظاہرہ کیا، احتجاج میں شرکت کیلئے آنے والے سابق گورنر خیبر پختونخوا شاہ فرمان کو کارکنوں نے گھیر لیا، اس دوران شاہ فرمان اور پی ٹی آئی کارکنوں کے درمیان تلخ جملوں کا تبادلہ بھی ہوا۔
پی ٹی آئی ورکرز نے کہا کہ شاہ فرمان جب گورنر تھے توکارکنوں کا حال تک نہیں پوچھا اور مشکل وقت میں بھی انھوں نے ورکرز کی خبر نہیں لی۔ شاہ فرمان کارکنوں کو منانے کی کوشش کرتے رہے اور ناکامی پر احتجاج چھوڑ کر چلے گئے۔ کارکنوں نے اس موقع پر شاہ فرمان کے خلاف لوٹا لوٹا کے نعرے بھی لگائے۔
اس حوالے سے نائب صدر پی ٹی آئی خیبرپختونخوا ظاہر شاہ طورو نے کہا ہے کہ کارکنوں اور لیڈرز میں ایسی باتیں ہوتی رہتی ہیں۔ انہوں نے کہا کہ شاہ فرمان اور کارکنوں کے مابین پیش آنے والا واقعہ کوئی انہونی بات نہیں۔