لاہور: سابق آرمی چیف جنرل قمرجاوید باجوہ کے سمدھی اور لاہور کی معروف کاروباری شخصیت صابر حمید خان عرف صابر مٹھو کو منی لانڈرنگ کے الزام ایف آئی اے نے طلب کرلیا۔
وفاقی تحقیقاتی ایجنسی (ایف آئی اے) کی طرف سے 20 اکتوبر کو جاری کردہ نوٹس کے مطابق صابرمٹھوکواینٹی منی لانڈرنگ ایکٹ کے تحت 23اکتوبرکوطلب کیاگیاہے۔
صابرمٹھو کےخلاف کال اپ نوٹس ڈی ایچ اے لاہورکے فیز تھری سمیت ان کی تین رہائش گاہوں پربھجوایا گیا ہے۔ایف آئی اے کے نوٹس میں صابرمٹھوکیخلاف مشکوک ٹرانزکشن کاحوالہ دیا گیا ہے۔
ایف آئی اے کے مطابق صابر مٹھوکے 19بینک اکائونٹس ہیں جن میں سے 14اکاؤنٹس پاکستانی بینکوں اور5 غیر ملکی بینکوں میں ہیں۔
ایف آئی اے کے مطابق ان اکاؤنٹس کے ذریعے 5 ارب 34 کروڑ  روپے کی ٹرانزیکشن کی گئیں۔
ایف آئی اے نوٹس کے مطابق صابر حمید خان کو کہا گیا ہے کہ انہوں نے جن ممالک کا دورہ کیا انکی تفصیلات بھی ساتھ لائیں،اپنی آف شوراورشیل کمپنیوں کا تمام ریکارڈ بھی ساتھ لائیں۔
نوٹس میں کہا گیا ہے کہ اندرون اوربیرون ملک جائیدادوں اور گاڑیوں کی تفصیلات ،فارن کرنسی کی خریدوفروخت کا تمام ریکارڈبھی ساتھ لائیں۔
نوٹس میں کہا گیا ہے کہ ہدایات پر عمل نہ کرنے کی صورت میں سخت کارروائی عمل میں لائی جاسکتی ہے۔