پاکستان مسلم لیگ ن کے قائد نواز شریف لندن سے سعودی عرب پہنچ گئے ہیں۔

نوازشریف لندن کے ہیتھرو ایئرپورٹ سے سعودی ایئرلائن کی پرواز کے ذریعے جدہ پہنچے جہاں مسلم لیگ ن کے رہنمائوں اور کارکنوں کی جانب سے ان کا استقبال کیا گیا۔

لیگی قائد نواز شریف کچھ روز سعودی عرب میں قیام کے بعد دبئی روانہ ہو جائیں گے جہاں سے 21 اکتوبر کو پاکستان پہنچیں گے۔

سعودی عرب روانگی کے لیے نوازشریف لندن کی ایون فیلڈ رہائشگاہ سے ہیتھرو ایئرپورٹ پہنچے تھے، اس موقع پر پاکستانی ہائی کمشنر کی جانب سے ان کا استقبال کیا گیا۔

نواز شریف جب لندن سے سعودی عرب کے لیے روانہ ہوئے تو اس موقع پر کارکنوں کی بھی بڑی تعداد ان کی رہائشگاہ کے باہر موجود تھی۔

نگران وزیراعظم پاکستان انوار الحق کاکڑ نے کہا ہے کہ نواز شریف کی وطن واپسی پر سب کچھ قانون کے مطابق ہو گا، حکومت اس حوالے سے وزارت قانون سے بھی رائے لے گی۔

پاکستان ہائی کمیشن لندن میں پریس کانفرنس کرتے ہوئے نگراں وزیراعظم نے کہاکہ کسی کو کوئی ڈیل کا ڈھیل نہیں دی جا رہی، سانحہ 9 مئی کے ملزمان کے خلاف قانون کے مطابق کارروائی کی جائے گی۔

انوارالحق کاکڑ نے کہاکہ نگران حکومت کی کسی سیاسی جماعت یا گروہ سے کوئی وابستگی نہیں، قانون کے مطابق تمام سیاسی جماعتوں کو انتخابات میں حصہ لینے کی اجازت ہے، جن کیخلاف قانونی کارروائی ہو رہی ہے انہیں عدالتوں سے ہی ریلیف مل سکتا ہے۔

انہوں نے کہاکہ عام انتخابات کی تاریخ کا اعلان الیکشن کمیشن نے کرنا ہے، حکومت انتخابات کے شفاف انعقاد میں اپنا بھرپور کردارا ادا کرے گی۔

وزیراعظم نے کہاکہ نگراں حکومت معیشت پر توجہ دے رہی ہے، ڈسکوزکی نجکاری کے معاملہ پر تیزی سے کام جاری ہے، جلد نتائج سامنے آئیں گے۔ ایس آئی ایف سی معاشی بحالی کیلئے قانونی پلیٹ فارم ہے۔

انہوں نے کہا کہ غیر ملکی کمپنی پاکستان میں اربوں ڈالر کی سرمایہ کاری کر رہی ہے، افراتفری کا تاثر درست نہیں، کئی کمپنیاں پاکستان میں سرمایہ کاری کی خواہاں ہیں۔

انہوں نے مزید کہاکہ بھارت کی دہشتگردی اب خطے سے نکل کر عالمی سطح پر پہنچ چکی ہے، کینیڈا میں سکھ رہنما کے قتل کے بعد عالمی برادری کو اپنا کردار ادا کرنا چاہیے۔