مالدیپ نے صدارتی انتخابات کا مرحلہ اختتام پذیر ہو گیا ہے اور چین کے حامی امیدوار محمد معیزو نے میدان مار لیا ہے۔

غیر ملکی میڈیا رپورٹس کے مطابق صدارتی امیدوار محمد معیزو نے 54.06 فیصد ووٹ حاصل کر کے کامیابی حاصل کی ہے۔

محمد معیزو کے مد مقابل امیدوار موجودہ صدر ابراہیم محمد صالح نے اپنی شکست کو تسلیم کرتے ہوئے نومنتخب صدر کو مبارکباد دی۔

نومنتخب صدر محمد معیزو نے سماجی رابطے کی ویب سائٹ ایکس پر اپنے ایک بیان میں قوم کو مبارکباد دی ہے۔ انہوں نے لکھا کہ پرامن جمہوری عمل کا حصہ بننے پر عوام مبارکباد کے مستحق ہیں۔

اس کے علاوہ اپنے مختصر خطاب میں انہوں نے کہاکہ اس وقت تک جشن سے گریز کیا جائے جب تک انتخابی پابندیاں باضابطہ طور پر ختم نہیں ہو جاتیں۔

یاد رہے کہ نومنتخب صدر کے چارج سنبھالنے تک موجودہ صدر ابراہیم محمد 17 نومبر تک صدر دفتر میں کام کرتے رہیں گے۔