مستونگ میں 12 ربیع الاول کے جلوس میں ہونے والے خود کش حملے کی تحقیقات جاری ہیں۔
خود کش دھماکے میں ڈی ایس پی مستونگ سمیت 59 افراد جاں بحق اور درجنوں شہری زخمی ہوگئے تھے۔ خود کش دھماکے کا مقدمہ کوئٹہ کے محکمہ انسداد دہشت گردی (سی ٹی ڈی ) تھانے درج کرلیا گیا ہے ۔ ترجمان سی ٹی ڈی کا کہنا ہے کہ حملہ آور کے جسمانی اعضا ڈی این اے کیلئے بھجوائے جا رہے ہیں۔
ادھرنگراں وزیرداخلہ سرفراز بگٹی نے میڈیا سے گفتگو کرتے ہوئے کہا ہے کہ ہمیں معلوم ہے یہ دہشتگردی کون کہاں سے کر رہا ہے، ہم دہشتگردوں اور ان کے ساتھیوں کو ان کے بلوں سے ڈھونڈیں گے۔ انہوں نے کہا کہ اس واقعے کے پیچھے بھارتی خفیہ ایجنسی “را” کا ہاتھ ہے۔ انہوں نے کہا کہ ہم اچھی طرح جانتے ہیں ان کی ڈوریں کہاں سے ہلائی جا رہی ہیں ۔
دریں اثنا سی ٹی ڈی کےترجمان کا کہنا ہے کہ قانون نافذ کرنے والے اداروں کے ساتھ مل کر واقعہ کے مختلف پہلووں کاجائزہ لیا جا رہا ہے، دھماکے کے مقام کے اطراف کی جیو فینیسنگ بھی کروائی جارہی ہے تاہم فی الحال کوئی گرفتاری عمل میں نہیں لائی جا سکی۔