اسلام آباد: مسلم لیگ (ن) کے سینیٹر مصدق مسعود ملک نے کہا کہ ملک کے مقامی توانائی کے وسائل میں کمی کی وجہ سے ملکی زرمبادلہ کے ذخائر کا بڑا حصہ توانائی کی درامد پر خرچ ہو جاتا ہے اس کی بڑی وجہ یہ ہے کہ توانائی کے شعبے پر اشرافیہ کا قبضہ ہے ۔ انہوں نے یہ بات پالیسی ادارہ برائے پائیدار ترقی کی سینیٹرز اور سیاسی جماعتوں کی قیادت کے ساتھ ایک روزہ مشاورتی میٹنگ میں کہی ۔مشاورتی سیشن کے اہتمام کا مقصد ملک کو درپیش چیلنجز اور اقتصادی بحران کے موجودہ آزمائشی دور میں پائیدار مستقبل کے لیے صاف توانائی پر منتقل ہونے کے مواقع کا جائزہ لینا تھا۔بحث میں سینیٹرز مصدق ملک، انجینئر رخسانہ زبیری، فرح ناز، سیمی ایزدی نے حصہ لیا جبکہ سابق ایم این اے شاہدہ اختر علی اور سابق ایس اے پی ایم ملک امین اسلم بھی موجود تھے۔ انہوں نے کہا کہ اشرافیہ پیدا ہونے والی کل گیس کا ایک تہائی حصہ کھاد کی تیاری کے لئے استعمال کرتی ہے حالانکہ یہ فیصلہ اس لئے کیا گیا تھا کہ کسانوں کوکھاد پر سبسڈی دی جا سکے ۔انہوں نے کہا کہ اشرافیہ کی ملکی وسائل پر گرفت کی وجہ سے گیس سے پیدا ہونے والی سب سے سستی توانائی کھاد بنانے والی ان فیکٹریوں کو دیدی جاتی ہے جو اشزافیہ کی ملکیت ہیں جبکہ دوسری طرف بجلی کے انتہائی مہنگے ٹیرف کا رخ غریبوں کی طرف موڑ دیا جاتا ہے جن کی کوئی آواز بھی نہیں سنتا۔انہوں نے کہا کہ پاکستان کو اپنی توانائی کی منتقلی کو اقتصادی حقائق کے مطابق سنبھالنے کی ضرورت ہے جس میں ذمہ داری سب سے اہم ہے۔ انہوں نے کہا کہپ سستی توانائی کے حصول کیلئےپاکستان اپنے کوئلے کے 6.3کھرب ڈالر کے ذخائر کو استعمال میں لا سکتا ہے لیکن اس سے پیدا ہونے والے ماحولیاتی اثرات سے نمٹنے کیلئے ہمیں اپنی سٹریٹجک پوزیشن بنانا ہو گی ۔انہوں نے کہا کہ ہائیڈروجن پیدا کرنے والی ٹیکنالوجی سے بھی مدد لےسکتا ہے۔ پیپلز پارٹی کی سینیٹر انجینئر رخسانہ زبیری نے کہا کہ اٹارنی جنرل پر قانونی پابندی ہونی چاہیے کہ وہ ایسے سرکاری یا نجی اداروں کے مقدمات میں پیش نہ ہوں جن سے توانائی کے معاہدوں کے علاوہ عوامی حقوق بھی متاثر ہوتے ہوں۔