پاکستان کے معروف گلوکار عاطف اسلم نے اسرائیلی فوج کے مظالم کا شکار فلسطینیوں کے لیے 15 ملین روپے کی امداد عطیہ کر دی ہے۔

عاطف اسلم نے 15 ملین روپے کی رقم معروف فلاحی تنظیم الخدمت فائونڈیشن کو دی ہے اور تنظیم کی جانب سے اس کی تصدیق بھی کر دی گئی ہے۔

الخدمت فائونڈیشن نے 15 ملین روپے عطیہ کرنے پر عاطف اسلم کا شکریہ بھی ادا کیا ہے۔

عاطف اسلم نے اس سے قبل فلسطینی عوام کے حق میں سوشل میڈیا پر آواز اٹھائی تھی جس پر بھارتی مداحوں کی جانب سے انہیں تنقید کا سامنا کرنا پڑا تھا۔

یاد رہے کہ اسرائیل اور فلسطین کی مزاحمتی تنظیم حماس کے درمیان جاری کشیدگی کے باعث صورتحال تشویشناک ہے اور اب تک ہونے والی اسرائیلی بمباری کے نتیجے میں شہید ہونے والے فلسطینیوں کی تعداد 4 ہزار سے بڑھ گئی ہے۔

اسرائیل اور فلسطین کے تنازع میں جہاں مغربی دنیا اسرائیل کی حمایت میں کھل کر سامنے آئی ہے وہیں بھارت بھی مسلم دشمنی کے باعث اسرائیل کی حمایت کر رہا ہے۔

اسرائیل اور فلسطین کے درمیان جہاں براہِ راست کشیدگی کا سلسلہ جاری ہے وہیں سوشل میڈیا پر الگ سے ایک جنگ ہو رہی ہے۔

پاکستان کے عالمی شہرت یافتہ گلوکار عاطف اسلم نے فلسطین کے مظلوم عوام کے حق میں آواز بلند کی ہے جس پر بھارتی صارفین کی جانب سے انہیں تنقید کا نشانہ بنایا جا رہا ہے۔

عاطف اسلم نے انسٹا گرام پر اپنی ایک پوسٹ میں لکھا کہ اسرائیل کی بمباری میں ہزاروں معصوم فلسطینیوں کی جانیں چلی گئی ہیں جس کا مجھے شدید دکھ ہے۔

گلوکار نے اللہ پاک سے رحم کی دعا کرتے ہوئے کہا کہ اس مشکل وقت میں آئیں ساتھ کھڑے ہو جائیں۔

عاطف اسلم کی اس پوسٹ پر جہاں مسلم کمیونٹی نے ان کے موقف کو خوب سراہا وہیں بھارتیوں کو اس پر آگ لگ گئی ہے۔

عاطف اسلم کے ایک چاہنے والے بھارتی صارف نے انسٹا گرام پر لکھا کہ وقت آ گیا ہے کہ ایک پسندیدہ گلوکار کو انسٹا گرام سے اَن فالو کر دیا جائے۔

ایک اور بھارت صارف لکھتے ہیں کہ آپ کو پاکستان کو واپس بھیجنے کا فیصلہ بالکل درست تھا۔ اب آپ میرے پسندیدہ گلوکاروں میں شامل نہیں رہے۔

راہول نامی صارف نے ہمیشہ اسرائیل کے ساتھ کھڑے رہنے کی پوسٹ کر دی اور عاطف اسلم کو تنقید کا نشانہ بنایا۔