لاہور( این این آئی) نگران وزیراعلی پنجاب محسن نقوی نے میٹروبس اورسپیڈوبس سروس کے کرائے میں 15روپے اضافے کی سمری مسترد کردی جبکہ ریلوے اسٹیشن تاگرین ٹائون الیکٹرک بسیں چلانے کی اصولی منظوری دیدی گئی ۔

نگران وزیراعلی پنجاب محسن نقوی کی زیر صدارت پنجاب ماس ٹرانزٹ اتھارٹی کا 24واں اجلاس ہوا ۔ اجلاس میںصوبائی وزیر ٹرانسپورٹ ابراہیم حسن مراد،سیکرٹری ٹرانسپورٹ،سیکرٹری فنانس اور پنجاب ماس ٹرانزٹ اتھارٹی کے حکام نے شرکت کی ۔

پنجاب ماس ٹرانزٹ اتھارٹی کے اجلاس میں کرائے میں اضافے کی سمری پیش کی گئی۔ محسن نقوی نے کہا کہ ریونیو میں اضافے کیلئے نئے اورمنفرد انداز سے کام کیا جائے۔ اجلاس میں ریلوے اسٹیشن تاگرین ٹائون الیکٹرک بسیں چلانے کی اصولی منظوری دی گئی ۔

ورلڈ بینک کے تعاون سے لاہور میں پائلٹ پراجیکٹ کے تحت 27 الیکٹرک بسیں چلائی جائیں گی۔اسلام آباد و راولپنڈی پاکستان میٹروبس سروس کیلئے بھی الیکٹرک بسیں چلانے کا فیصلہ کیا گیا ۔

اجلاس میں وزیراعلی محسن نقوی نے راولپنڈی اورلاہور میں میٹروبس ٹریک کی تعمیر و مرمت کاحکم دیا جبکہ قذافی ا سٹیڈیم اورشاہدرہ ریلوے اسٹیشن کی تعمیرومرمت اورتزئین و آرائش کی منظوری بھی دی گئی ۔

اجلاس میں پنجاب ماس ٹرانزٹ اتھارٹی کے اجلاس میں ڈیزل ہائبرڈ ری جنریٹو بسیں چلانے کی تجویز کا بھی جائزہ لیا گیا ۔ وزیراعلی نے الیکٹر ک بس سروس کیلئے فوری اقدامات کا حکم دیا ۔وزیراعلی محسن نقوی نے پنجاب ماس ٹرانزٹ اتھارٹی میں انسانی وسائل کی کمی کو پورا کرنے کی منظوری دے دی۔

انہوں نے کہا کہ عوام کو معیاری اورمحفوظ سفر کی سہولتیں فراہم کرنا چاہتے ہیں۔سیکرٹری ٹرانسپورٹ نے بریفنگ میں بتایا کہ پنجاب ماس ٹرانزٹ اتھارٹی تقریباً سواارب مسافروں کا ہدف عبور کرچکی ہے۔

پنجاب ماس ٹرانزٹ اتھارٹی6بس سروس سسٹم آپریٹ کررہی ہے،اورنج لائن میٹروٹرین پر روزانہ25ہزار طلبہ مفت سفر کررہے ہیں، پنجاب ماس ٹرانزٹ اتھارٹی کو حکومت پاکستان کی طرف ڈویلپمنٹ لیڈر شپ کے ایوارڈ سے نوازا گیا ہے۔