سعودی ولی عہد شہزادہ محمد بن سلمان نے جاپان کے وزیر اعظم فومیو کیشیدا سے ٹیلی فونک رابطہ کیا ہے۔

سعودی خبررساں ادارے کے مطابق ٹیلی فونک رابطے کے دوران دونوں رہنمائوں نے غزہ میں فوجی کشیدگی میں اضافے پر تبادلہ خیال کیا۔

سعودی ولی عہد نے اس بات پر زور دیا کہ سعودی عرب غزہ میں شہریوں کو نشانہ بنانے کو ایک گھنائونا جرم اور وحشیانہ حملہ سمجھتا ہے۔ انہوں نے وہاں کے شہریوں کے تحفظ کے لیے کام کرنے کی ضرورت پر زور دیا۔

شہزادہ محمد بن سلمان نے فوجی کارروائیوں کو روکنے، علاقائی اور بین الاقوامی سلامتی، امن و استحکام پر اس کے خطرناک اثرات سے بچنے کےلیے کشیدگی کو کم کرنے کی کوششوں کو مستحکم بنانے کی اہمیت پر بھی زور دیا۔

ترکیہ کے صدر رجب طیب اردوان اور ایرانی صدر ابراہیم رئیسی نے سعودی ولی عہد شہزادہ محمد بن سلمان سے رابطہ کیا ہے۔

رجب طیب اردوان اور ابراہیم رئیسی کی محمد بن سلمان سے ٹیلیفونک گفتگو میں فلسطین کی صورت حال پر تبادلہ خیال کیا گیا۔

غیرملکی میڈیا رپورٹس کے مطابق ایران اور سعودی عرب کے درمیان معاہدے کے بعد ایرانی صدر اور سعودی ولی عہد کا یہ پہلا ٹیلیفونک رابطہ ہے۔

دونوں رہنماؤں کے درمیان اس بات پر اتفاق کیا گیا کہ فلسطینیوں کے خلاف جنگی جرائم کے خاتمے کے لیے اقدامات کیے جائیں گے۔

دوسری جانب ترکیہ کے صدر رجب طیب اردوان اور سعودی ولی عہد کے درمیان گفتگو میں بھی خطے کی کشیدہ صورت حال پر بات چیت کی گئی ہے۔

سعودی ولی عہد نے اس موقع پر کہا کہ سعودی عرب کی جانب سے کشیدگی کو روکنے کے لیے کوششیں کی جا رہی ہیں۔