امریکی میڈیانے فیس بک اورٹوئٹرپربھارتی حکومت کے دبائوکوبے نقاب کردیا۔
ممتازامریکی اخبارواشنگٹن پوسٹ نے اپنے ایک مضمون میں انکشاف کیا ہے کہ سوشل میڈیا پلیٹ فارم” فیس بک“ بھارتی حکومت کے دبائو پربھارت کے زیرتسلط مقبوضہ جموں و کشمیر میں پروپیگنڈے اور نفرت انگیزتقاریرکوپروان چڑھنے دیتاہے۔
کشمیر میڈیا سروس کے مطابق مضمون میں تقریباً تین برس قبل سوشل میڈیا پر اثر انداز ہونے والی ایک وسیع کارروائی کا پردہ فاش ہوا ہے جس میں مقبوضہ جموں و کشمیر میں بھارتی فوج کے کریک ڈائون کی تعریف کرنے اور کشمیری صحافیوں پربغاوت کا الزام لگانے کے لیے سینکڑوں جعلی اکائونٹس کا استعمال کیا گیا۔
مضمون میں کہا گیا ہے کہ اس نیٹ ورک کو سری نگر میں مقیم بھارتی فوج کی چنار کور چلاتی تھی۔ مضمون میں کہا گیا ہے کہ جب فیس بک کے امریکہ میں مقیم سپروائزر نے بھا رت میں اپنے ساتھیوں کو نیٹ ورک کے صفحات حذف کرنے کی ہدات کی تو نئی دہلی کے دفتر کے ایگزیکٹوز نے حکومتی ردعمل اور قانونی نتائج کے خوف سے ایسا کرنے سے انکار کیا۔
چنانچہ بھارتی فوجی یونٹ نے غلط معلومات پھیلانے کا سلسلہ جاری رکھا جس سے کشمیری صحافی خطرے میں پڑ گئے۔
یہ تعطل صرف اس وقت حل ہوا جب فیس بک کے اعلیٰ عہدیداروں نے مداخلت کی اور جعلی اکائونٹس کو حذف کرنے کا حکم دیا۔ واشنگٹن پوسٹ کے مضمون میں کہا گیا کہ کہ ٹویٹر(ایکس) نے بھی بھارتی حکومت کے دبائومیں آکراپنے قواعد و ضوابط ترک کیے اور ملازمین کی حفاظت سے متعلق خدشات کی وجہ سے اپنا نقطہ نظر تبدیل کیا۔ فیس بک نے بالآخر چنار کور کے جعلی اکائونٹس بند کر دیئے لیکن بھارتی فوج کو ہزیمت سے بچانے کے لیے ہٹانے کا انکشاف نہیں کیا۔ ٹویٹر نے بھی خاموشی سے چنار کور کے نیٹ ورک کو ہٹا دیا ۔