فلسطین کی مزاحمتی تنظیم حماس نے اسرائیل پر حملے کے دوران یرغمال بنائے گئے افراد میں سے مزید 2 معمر خواتین کو رہا کر دیا ہے۔

مزاحمتی تنظیم نے یرغمالی خواتین کو رہا کرنے کی تصدیق کرتے ہوئے کہا کہ قطر اور مصر نے خواتین کی رہائی میں ثالثی کا کردار ادا کیا ہے۔

غیرملکی میڈیا کے مطابق رہا کی گئی 79 سالہ نوریت کوپر اور 85 سالہ یوشیوڈ لیفشٹز اسرائیلی شہری ہیں جنہیں حملے کے دوران یرغمال بنایا گیا تھا۔

میڈیا رپورٹس کے مطابق مزاحمتی تنظیم نے رہا کی گئی خواتین کو انٹرنیشنل ریڈ کراس کے ذریعے اسرائیلی حکام کے حوالے کیا ہے۔

واضح رہے کہ اس سے قبل حماس نے قطری حکومت کے ساتھ ایک معاہدہ کرتے ہوئے 2 امریکی خواتین ماں بیٹی کو رہا کیا تھا۔

حماس کے عسکری ونگ کے ترجمان نے بتایا ہے کہ شہری یرغمالیوں کی رہائی کے لیے قطر اورر مصر کے ساتھ مل کر کام کر رہے ہیں۔