یورپی یونین نے ایران میں لباس کی سخت پابندیوں کے خلاف احتجاج کے دوران پولیس حراست میں جاں بحق ہونے والی 22 سالہ مہاساامینی کو انسانی حقوق کے اعلیٰ اعزاز سخاروف پرائز سے نوازا ہے۔
16 ستمبر 2022 کوایرانی پولیس کی حراست میں مہاسا امینی کی موت پر ایران میں ملک گیر مظاہرے ہوئے تھے اور منظم تحریک کی شکل اختیار کرگئے تھے، اس تحریک میں سامنے آنے والے نعرے عورت، آزادی اور زندگی آج بھی ایک مہم کی شکل اختیار کئے ہوئے ہیں۔
جمعرات کو یورپی پارلیمنٹ کی اسپیکر روبرٹا میٹسولا نے ایوارڈ کا اعلان کرتے ہوئےکہا، “22 سالہ جینا مہسا امینی کے وحشیانہ قتل نے خواتین کی قیادت میں ایک ایسی تحریک کو جنم دیا جو تاریخ رقم کر رہی ہے۔”
میٹسولا نے کہا کہ تحریک کا تین لفظوں کا نعرہ “ایران میں مساوات، وقار اور آزادی کے لیے کھڑے ہونے والے تمام لوگوں کے لیے ایک آواز ہے۔”
یورپی یونین کایہ اعلان ایرانی حقوق کی علمبردار نرگس محمدی کو امن کا نوبل انعام دینے کے دو ہفتے بعد سامنے آیا ہے۔
محمدی کو امن کا نوبل انعام ایران میں لازمی حجاب کے خلاف اور ملک میں خواتین پر ہونے والے ظلم کے خلاف ان کی جدوجہد کے اعتراف میں دیا گیا تھا۔
سخاروف انعام کی مالیت50 ہزار یورو کے برابر ہے جو 13 دسمبر کو یورپی پارلیمنٹ کی ایک تقریب میں امینی کی فیملی کودیا جائے گا۔

برسلز (این این آئی)یورپی کمیشن نے فلسطینیوں کے لیے 691 ملین یورو کی ترقیاتی امداد کے اپنے مکمل پورٹ فولیو پر نظر ثانی کرنے کا فیصلہ کیا ہے۔
غیرملکی خبررساں ادارے کے مطابق یورپی یونین کے کمشنر برائے پڑوس اور توسیع اولیور ورہیلی نے سوشل میڈیا پلیٹ فارم ”ایکس” پر جاری ایک پوسٹ میں کہا کہ اسرائیل اور اس کے لوگوں کے خلاف دہشت گردی اور بربریت کا پیمانہ ایک اہم موڑ ہے۔ورہیلی نے کہا کہ اب معمول کے مطابق کوئی بزنس نہیں ہو سکتا۔انہوں نے مزید لکھا کہ اس فیصلے کا مطلب ہے کہ ادائیگیاں فوری طور پر معطل کر دی جائیں گی ، منصوبوں کا جائزہ لیا جائے گا اور بجٹ کی نئی تجاویز اگلے نوٹس تک ملتوی کر دی جائیں گی۔