اسلام آباد(این این آئی)پاکستان پیپلز پارٹی آزاد کشمیر کے صدر سردار محمد یاسین نے کہا ہے کہ حکومت پاکستان آزاد کشمیر کے لیے پروڈکشن چارجز کی مد میں بجلی فراہم کرے ،مسئلہ کشمیر کو سب سے زیادہ نقصان پی ٹی آئی دور حکومت میں ہوا بھٹو نے کشمیر کی آزادی کے لیے ایک ہزار سال تک جنگ لڑنے کا اعلان کیا تھا ،پیپلز پارٹی کے دوراقتدار میں مسئلہ کشمیر سب سے زیادہ ہائی لائٹ ہوا ،پاکستان میں ہونے والے تمام بڑے کام پیپلز پارٹی کے دور اقتدار میں ہوئے جن میں ایٹمی پاور پلانٹس کا قیام، آئین پاکستان اور ہیوی مکینیکل کمپلیکس ٹیکسلا کا قیام شامل ہے جبکہ اٹھارویں ترمیم کے ذریعے پارلیمنٹ کو اختیارات کی منتقلی بھی پاکستان پیپلز پارٹی کے دور حکومت میں ہی ہوئی۔انہوں نے ان خیالات کا اظہار نیشنل پریس کلب اسلام آباد میں پیپلز پارٹی میں شمولیتی پروگرام کے موقع پر پریس کانفرنس کرتے ہوئے کیا ، پیپلز پارٹی میں شمولیت اختیار کرنے والوں میں سردار جمیل اختر، ڈاکٹر ریاست ،سردار زبیر ،سردار عاصم مسعود ایڈووکیٹ، سردار وقار ،سردار نجید اختر، سردار حفیظ، سردار قیوم اور عبداللہ اصف شامل تھے، اس موقع پرپارٹی میں شمولیت اختیار کرنے والوں کا کہنا تھا کہ پیپلز پارٹی چھوڑنا ان کی بہت بڑی غلطی تھی ،پیپلز پارٹی شہیدوں کی جماعت ہے اور ازاد کشمیر کے مسائل حل کرنے کی صلاحیت رکھتی ہییہ پارٹی عام آدمی کی پارٹی ہے،انہوں نے پارٹی کی قیادت پر مکمل اعتماد کا اظہار کرتے ہوئے پارٹی میں دوبارہ شمولیت کا اعلان کیا۔ اس موقع پر پاکستان پیپلز پارٹی آزاد کشمیر کے سیکرٹری جنرل فیصل ممتاز راٹھور نے کہا کہ عوام کی آواز ہی ہماری آواز ہے ،سینٹ کمیٹی میں وزیراعظم ازاد کشمیر کی گفتگو اس کا واضح ثبوت ہے، انہوں نے کہا کہ اس حوالے سے 16 رکنی کمیٹی بنائی گئی ہے جو حکومت پاکستان سے بات کرے گی، کشمیریوں نے پاکستانیوں سے بڑھ کر قربانیاں دی ہیں، آزاد کشمیر میں احتجاجی تحریک کے پیچھے کچھ سازشی عناصر بھی شامل ہیں ،ہمیں بجلی سستی ملنی چاہیے،اس وقت کشمیریوں کے اندر بے پناہ مایوسی ہے، اپنا تشخص برقرار رکھنے کے لیے آخری حد تک جائیں گے، پی پی عوام کی جدوجہد کی آواز بنتی رہے گی