کراچی(این این آئی) افغان باشندوں کی پاکستان سے اپنے ملک واپسی کا سلسلہ جاری ہے، غیرقانونی مقیم تمام غیرملکیوں کو پاکستان چھوڑنے میں 14 دن باقی رہ گئے۔غیر قانونی مقیم افغان شہریوں اور دیگر غیر ملکیوں کے خلاف سندھ حکومت بھی متحرک ہوگئی ہے۔

محکمہ داخلہ کی جانب سے سندھ بھر کے کمشنرز کو خط لکھ دیا گیا ہے۔خط میں کہاگیا ہے کہ غیر قانونی مقیم غیر ملکیوں کا ڈویژن اور ضلعی سطح پر ریکارڈ مرتب کیا جائے اور غیر ملکی شہریوں کو واپس بھیجنے کے لئے انتظامات کی حتمی شکل دی جائے ساتھ ہی غیر ملکیوں کے لئے کراچی اور سکھر میں اسمبلی پوائنٹس بنائے جائیں۔

خط میں کہا گیا ہے کہ افغان شہریوں کو وطن واپس بھیجنے کے لئے چمن تک بس سروس کا انتظام کیا جائے،اسمبلی پوائنٹس، ٹرانسپورٹ اور سیکیورٹی کی مد میں کتنا بجٹ درکار ہوگا اس کا تخمینہ لگایا جائے۔

یاد رہے غیرقانونی افغان باشندوں کوپاکستانی حکومت کی جانب سے31اکتوبرتک ملک چھوڑنیکی ڈیڈ لائن دی گئی تھی، اکتیس اکتوبر تک پاکستان نہیں چھوڑا تو قانون نافذ کرنے والے ادارے گرفتاری اور ملک بدری کویقینی بنائیں گے۔