ممبئی(این این آئی)بھارت کے وزیر اعظم نریندر مودی نے ہفتہ کو ممبئی میں انٹرنیشنل اولمپک کمیٹی (آئی او سی)کے اجلاس میں اعلان کیا ہے کہ ان کا ملک 2036 کی اولمپک گیمز کی میزبانی کے لیے بولی لگائے گا۔

غیرملکی خبررساں ادارے کے مطابق انہوں نے کہا قوم کوئی کسر نہیں چھوڑے گی اور ہندوستان ایونٹ کو منظم کرنے کی کوشش کرے گا۔ مودی نے کہا کہ ہندوستان نے ہاکی ورلڈ کپ اور جاری کرکٹ ورلڈ کپ سمیت عالمی ایونٹس منعقد کرنے کی اپنی صلاحیت کو ثابت کیا ہے۔

دنیا کی پانچویں سب سے بڑی معیشت بھارت 2047 تک ترقی یافتہ ملک بننے کا خواہاں ہے۔ بھارت عالمی سطح پر اپنی موجودگی درج کرانے کا بھی خواہش مند رہتا ہے۔ اس میگا ایونٹ کے انعقاد میں عوامی اخراجات میں اربوں ڈالر شامل ہوں گے۔

اس ایونٹ کے انعقاد سے اقتصادی فوائد بھی حاصل ہوں گے۔ ملک میں تعمیرات میں اضافہ ہوگا۔ غیر ملکی زائرین کے اخراجات کے ساتھ مزید سامان اور خدمات کی مانگ میں بھی اضافہ ہوگا۔مودی نے کہا کہ 1.4 بلین لوگوں کا ملک بھی 2029 کے یوتھ اولمپکس کی میزبانی کا خواہشمند ہے۔

بھارت میں اب تک منعقد کیے جانے والے سب سے بڑے کھیلوں کے ٹورنامنٹس میں سے ایک نئی دہلی میں 2010 کے دولت مشترکہ کھیل تھے۔اگلے سمر اولمپک گیمز 2024 میں پیرس میں ہوں گے۔ اس کے بعد 2028 میں لاس اینجلس اور 2032 میں برسبین۔ پولینڈ میں ہوں گے۔ میکسیکو اور انڈونیشیا ان ممالک میں شامل ہیں جنہوں نے 2036 کے ایونٹ کے انعقاد میں دلچسپی ظاہر کر رکھی ہے۔

لاس اینجلس (این این آئی)کرکٹ کو 2028 میں لاس اینجلس میں ہونے والے اولمپکس میں شامل کرلیا گیا۔

میڈیا رپورٹس کے مطابق لاس اینجلس اولمپکس میں کرکٹ کے ساتھ فلیگ فٹ بال، بیس بال اور سافٹ بال کو بھی اولمپکس کا حصہ بنالیا گیا ہے۔میڈیا رپورٹس کے مطابق لاس اینجلس اولمپکس آرگنائزنگ کمیٹی جلد کھیلوں کی شمولیت کا اعلان کرے گی۔

رپورٹس کے مطابق اسکواش کو اولمپکس میں اضافی کھیل کے طور پر شامل کرنے کی تجویز ہے جبکہ کرکٹ مقابلے ٹی 20 فارمیٹ میں ہوں گے۔

میڈیا رپورٹس کے مطابق لاس اینجلس اولمپکس میں مردوں اور خواتین دونوں کے کرکٹ مقابلے ہوں گے۔رپورٹس کے مطابق لاس اینجلس اور انٹرنیشنل اولمپک پروگرام کمیشن اتوار سے شروع ہونے والے آئی او سی کے 141ویں سیشن میں باقاعدہ اعلان کرے گی۔

برطانوی میڈیاکے مطابق کرکٹ کو لاس اینجلس اولمپک گیمز میں شامل کر لیا گیا ہے، اس سے پہلے 1900 میں پیرس میں ہونے والے اولمپکس میں کرکٹ کھیلی جا چکی ہے، جب انگلینڈ اور فرانس نے گولڈ میڈل کے لیے ایک ہی میچ کھیلا تھا۔

لاس اینجلس اولمپکس میں مردوں اور خواتین کا T20 ٹورنامنٹ ہوگا، جو ایشیا اور برصغیر میں ممکنہ طور پر منافع بخش تجارتی مارکیٹ کھول دے گا۔ہندوستان میں موجودہ اولمپک نشریاتی حقوق انفرادی کھیلوں کے لیے فروخت کیے جاتے ہیں اور پیرس 2024 کے لیے صرف 15اعشاریہ 6 ملین پاونڈ کی قیمت بتائی جاتی ہے۔

ماہرین کے مطابق اگر کرکٹ کو لاس اینجلس گیمز میں شامل کیا جائے تو یہ رقم 150 ملین پائونڈ تک بڑھ سکتی ہے۔اس کے ساتھ فلیگ فٹ بال، بیس بال اور سافٹ بال بھی 2028 کے لاس اینجلس اولمپکس میں شمولیت کے لیے تیار ہیں، جس کی انٹرنیشنل اولمپک کمیٹی کی جانب سے تصدیق ہونا باقی ہے۔