اسلام آباد (این این آئی)اسلام آباد ہائی کورٹ نے سابق ایم این اے صداقت عباسی کی بازیابی کی درخواست نمٹا دی۔

دورانِ سماعت ایڈیشنل اٹارنی جنرل منور اقبال، وزارتِ داخلہ اور پولیس کے حکام جبکہ درخواست گزار کی جانب سے ڈاکٹر بابر اعوان عدالت میں پیش ہوئے۔

چیف جسٹس عامر فاروق نے بابر اعوان سے سوال کیا کہ جی ڈاکٹر صاحب بندہ واپس آ گیا ہے؟

بابر اعوان نے جواب میں کہا کہ اس مردِ حریت کو سلام پیش کرنا چاہتا ہوں جس نے بندہ بازیاب کروا دیا۔

بابر اعوان کے اس جواب پر چیف جسٹس عامر فاروق نے قہقہہ لگاتے ہوئے کہا کہ آپ نے ایک لائن میں پوری بات کر دی پھر تو کیسں نمٹا دیتے ہیں۔

اسلام آباد(این این آئی)پاکستان تحریک انصاف کے رہنما صداقت عباسی کئی ماہ لاپتہ رہنے کے بعد گھر واپس پہنچ گئے۔

نجی ٹی وی کے مطابق پاکستان تحریک انصاف کے رہنما صداقت عباسی کئی ماہ لاپتہ رہنے کے بعد گھر واپس پہنچ گئے۔

پاکستان تحریک انصاف کے رہنما سانحہ نو مئی کے بعد سے روپوش تھے ۔

صداقت عباسی نے گزشتہ روز انسداد دہشت گردی کی عدالت سے ضمانت قبل از گرفتاری حاصل کی اور پھر وہ اپنے وکیل کے ہمراہ روانہ ہوگئے تھے۔

فیملی ذرائع کے مطابق صداقت عباسی گھر پہنچے تو والدہ اور بیٹیوں کے گلے لگ کر روتے رہے۔

ان کی گھر واپسی پر جذباتی مناظر دیکھنے کو ملے، جبکہ والدہ اور بیٹیاں گلے لگ کر روتی رہیں۔