ہینگزو(این این آئی)چین کے شہر ہینگزو میں 19ویں ایشین گیمز کا آغاز ہوگیا۔ افتتاحی تقریب میں اسٹیڈیم رنگ و نور میں نہا گیا، ایشین گیمز 8 اکتوبر تک جاری رہیں گے۔
آفیشلز میسکوٹ رقص کرتے اسٹیڈیم میں آئے اور گیمز میں شامل تمام ملکوں کے دستوں نے اپنے ملک کے پرچم تھامے مارچ پاسٹ کیا۔
افتتاحی تقریب میں چین کے صدر شی جنگ پنگ نے خصوصی شرکت کی۔ایشین گیمز میں 262 رکنی پاکستانی دستہ شرکت کر رہا ہے، پاکستانی دستے میں 53 خواتین اور 137 مرد ایتھلیٹس شامل ہیں۔
پاکستانی دستے کی قیادت جی ایم بشیر نے کی، پاکستان ایشین گیمز کے 24 کھیلوں میں حصہ لے رہا ہے، کھیلوں کے مقابلے 8 اکتوبر تک جاری رہیں گے۔پہلے سے جاری والی بال کے مقابلوں میں پاکستان نے جنوبی کوریا کو تین۔صفر سے ہرادیا۔
