لاہور( این این آئی)نگران وزیر توانائی محمد علی نے کہا ہے کہ گیس کے شعبے میں روزانہ ایک ارب روپے کا نقصان ہورہا ہے، گیس شعبے کا گردشی قرض 2800 سے 2900 ارب روپے ہے،گیس کی قیمتوں میں اضافے سے متعلق کام جاری ہے۔
گیس کی قیمتوں میں اضافہ ناگزیر ہے، 60 فیصد صارفین کو اضافے سے محفوظ رکھا جائے گا،چار پاور پلانٹس اور 10 ڈسکوز کی نجکاری پر بات چل رہی ہے۔ ایک انٹر ویو میں انہوں نے کہا کہ حویلی بہادر شاہ، بلوکی، گدو، نندی پور جنریشن پلانٹس کے نام نجکاری لسٹ میں شامل ہیں۔تین آپشنز زیر غور ہیں۔
پہلا آپشن کمپنیاں صوبوں کو دینا، دوسرا آپشن مکمل نجکاری اور تیسرا آپشن طویل المدتی معاہدے شامل ہیں، تینوں آپشن کابینہ کے سامنے رکھیں گے جو ماڈل منظور ہوا وہی فیصلہ ہوگا،کوشش ہے ڈسکوز کیلئے ایک ہی ماڈل اپنایا جائے، ڈسکوز میں بہتری کیلئے کام کررہے ہیں، اس سلسلے میں ڈسکوز کے بورڈ آف ڈائریکٹرز کو تبدیل کریں گے۔
