دہلی(این این آئی)بھارت نے پاکستان اورچین کے ساتھ سرحد پر156 ہیلی کاپٹرتعینات کرنے کی تیاری شروع کردی ۔
کشمیرمیڈیاسروس کے مطابق بھارت کے توسیع پسندانہ اور خطے میں بالادستی کے عزائم میں دن بہ دن شدت آتی جا رہی ہے ۔ بھارتی ائر فورس (آئی اے ایف )مزید 156 پراچنڈ لائٹ کامبیٹ ہیلی کاپٹر خریدنے جا رہی ہے، جو لائن آف کنٹرول (ایل او سی) اور لائن آف ایکچوئل کنٹرول پرتعینات کیے جائیں گے۔
کشمیرمیڈیا سروس کے مطابق دونوں محاذو ں پر پہلے ہی اس طرح کے 15ہیلی کاپٹر موجود ہیں۔ نئے 156 ہیلی کاپٹرز میں سے 66 بھارتی فضائیہ جبکہ باقی 90 بھارتی فوج کوفراہم کئے جائیں گے۔
پراچند ہیلی کاپٹر 5,000 میٹر (16,400 فٹ) کی بلندی پر لینڈ اور ٹیک آف کر سکتا ہے، جو اسے سیاچن گلیشیر اورمشرقی لداخ کے اونچائی والے علاقوں میں کام کرنے کے لیے مثالی بناتا ہے۔
یہ فضا سے زمین اورفضا سے فضا میں مار کرنے والے میزائلوں کی ایک رینج کو فائر کرنے کی بھی صلاحیت رکھتاہے۔ وزن میں ہلکے اس جنگی ہیلی کاپٹر کو انڈیا میں ہی ڈیزائن اور تیار کیا گیا ہے۔
