کوہاٹ: پاکستان تحریک انصاف پارلیمنٹرین کے سربراہ اور سابق وزیر دفاع پرویز خٹک نے سیاستدانوں کی ایمانداری پر سوال اٹھاتے ہوئے کہا ہے کہ اگر سیاسی لوگ ایماندار ہوتے تو ملک کا یہ حال نہ ہوتا

خبررساں ادارے این این آئی کے مطابق ہفتہ کے روز کوہاٹ میں جلسے سے خطاب کرتے ہوئے پرویزخٹک کاکہناتھا کہ اگر سیاسی لوگ ایماندار ہوتے تو ملک کا یہ حال نہ ہوتا۔ انہوں نے استفسار کیا کہ ہم کب تک کھوکھلے نعروں کے پیچھے بھاگیں گے؟

سابق وزیردفاع نے کہا کہ چائنا پاکستان اکنامک کوریڈور (سی پیک) ویسٹرن روٹ میں نے منظور کیا تھا، ہم ہی نے 18 لاکھ عوام کو مفت صحت کارڈ مہیا کیے تھے۔انہوں نے کہاکہ چیئرمین تحریک انصاف عمران خان نے نئے پاکستان کا جھوٹا نعرہ لگایا اور ملک کو تباہ کر دیا۔ پرویز خٹک نے کہا کہ دیگر سیاسی رہنماؤں سمیت چیئرمین پی ٹی آئی نے بھی پاکستان کو قرضوں میں جکڑ دیا، ہمیں چیئرمین پی ٹی آئی سے بہت امیدیں تھیں مگر وہ صرف امیدیں ہی تھیں۔

انہوں نے کہا کہ پی ٹی آئی پارلیمنٹرین نعروں کے لیے نہیں آئی ، ہم ایمانداری سے عوام کی خدمت کریں گے، جنوبی اضلاع بہت پسماندہ رہ گئے ہیں،ان کے لیے بہت کچھ کرنا ہے۔ سابق وزیردفاع نے کہا کہ کرپٹ حکمران کبھی ملک کو ترقی کی راہ پر گامزن نہیں کرسکتا۔

فری اینڈ فیئر الیکشن نیٹ ورک (فافن) نے الیکشن کمیشن آف پاکستان کی جانب سے ڈیجیٹل مردم شماری کی بنیاد پرکی گئی ابتدائی حلقہ بندیوں پرسوالات اٹھا دیئے ۔
پاکستان میں آزادانہ اورشفاف الیکشن کے حوالے سے کام کرنے والے ادارے فافن نے قومی اور صوبائی اسمبلیوں کے 180 حلقوں میں ردو بدل کوغیرمساویانہ قراردیتے ہوئے اعتراضات اٹھائے ہیں۔

فافن نے کہا کہ حلقہ بندیوں کی ابتدائی رپورٹ اور مجوزہ حلقوں کی فہرستوں کا تجزیہ اس بات کی عکاسی کرتا ہے کہ آبادی کا فرق کم سے کم رکھنے سے متعلق قانون کااطلاق نہیں کیا گیا ۔
فافن نے آبادی کے اصول کونظراندازکرکے بنائے گئے گیارہ ایسے حلقوں کی نشاندہی کی ہے جوایک سے زائداضلاع پرمشتمل ہیں۔
ان 11 قومی اسمبلی کے حلقوں میں سے 6 خیبر پختونخوا، 3 پنجاب اور دو سندھ میں ۔

میئر کراچی مرتضیٰ وہاب نے کہا ہے کہ جماعت اسلامی روز پریس کانفرنس میں مایوسی پھیلاتی ہے ۔انہوں نے کہا کہ یہ لوگ نہیں چاہتے کہ کراچی اپنے پیروں پر کھڑا ہو اس لئے یہ ہمیں ٹیکس نہیں جمع کرنے دے رہے۔
کراچی میں تقریب سے خطاب کرتے ہوئے مرتضیٰ وہاب نے کہا کہ ہم کراچی کی منفی چیزوں کو مثبت چیزوں سے تبدیل کرکے ماضی کی کوتاہیوں کو دور کر نا چاہتے ہیں تاکہ شہریوں کو زیادہ سے زیادہ تفریحی سہولتیں میسر ہو سکیں۔
انہوں نے کہا کہ کراچی چڑیا گھرمیں میں نئے جانور لانے کی ضرورت ہے اور اسے بین الاقوامی معیار تک لانے کے لیے بہت کام کرنا باقی ہے ۔
انہوں نے کہا کہ میں یہ نہیں کہتا کہ میرے پاس اختیارات نہیں، ہم نے پانی مافیا کے خلاف کارروائی شروع کر رکھی ہے۔ میری کوشش ہے کہ کراچی میں کسی مافیا کو نہ چلنے دوں۔

آئی ایم ایف کے موجودہ قرض پروگرام کی دوسری قسط کے لئے مذاکرات اکتوبر کے آخری ہفتے میں  ہوں گے اس ضمن میں وزارت خزانہ نے ضروری تیاریاں شروع کر دی ہیں۔

عالمی مالیاتی فنڈ (آئی ایم ایف) کے موجودہ قرض پروگرام کی دوسری قسط کے معاملے پر آئی ایم ایف کے وفد کی اکتوبر کے آخری ہفتے میں پاکستان آمد کا امکان ہے۔

وزارت خزانہ کے ذرائع کا کہنا ہے کہ فیڈرل بورڈ آف ریونیو سے آئی ایم ایف کی آن لائن میٹنگ ہوئی  ہے، جس میں پاکستان کی طرف سے آئی ایم ایفپر واضح کر دیا گیا ہےکہ نگران حکومت کوئی نیاٹیکس نہیں لگائےگی تاہم  ایف بی آر  طے شدہ ٹیکس ہدف حاصل کرنے کیلئے پرعزم ہے۔

بتایا جاتا ہے کہ آئی ایم ایف کے وفد نے ایف بی آر کی کارکردگی پر اطمنان ظاہر کیا ہے۔ معلوم ہوا ہے کہ وزارت خزانہ آئی ایم ایف کو اکتوبر کے پہلے ہفتے میں معاشی کارکردگی اور رواں مالی سال جولائی تا ستمبر محصولات کا ڈیٹاپیش  کرے گی۔ جس میں  ٹیکس چوروں کیخلاف کارروائیوں کے پلان سے بھی آئی ایم ایف کو آگاہ  کیا جائے گا۔

لاہور کی انسداد دہشت گردی عدالت نے جناح ہاؤس جلاؤ گھیراؤ کے کیس میں پاکستان تحریک انصاف کے9 رہنماؤں کواشتہاری قرار دے کر انکے دائمی وارنٹ گرفتاری جاری کر دیئے۔ پی ٹی آئی کے مزکورہ 9 رہنما عرصہ سے دانستہ روپوش ہیں۔
عدالت کی طرف سے اشتہاری قرار دیئے جانے والوں میں حماد اظہر، فرخ حبیب، مراد سعید، اعظم سواتی، علی امین گنڈا پور شامل ہیں۔
علاوہ ازیں عدالت نےمیاں اسلم اقبال، زبیر نیازی، کرامت کھوکھر اور عندلیب عباس کو بھی اشتہاری قرار دیا ہے۔ان رہنماؤں کے خلاف تھانہ سرور روڑ میں مقدمہ درج ہے اور اس سے قبل بھی انسداد دہشتگردی عدالت نے ملزمان کے ناقابل ضمانت وارنٹ گرفتاری جاری کیے تھے۔