پاکستان نے کپاس کی پیداوار میں اہم سنگ میل عبور کر لیا

اسلام آباد(این این آئی)پاکستان نے کپاس کے شعبے میں اہم سنگ میل عبور کر لیا ۔
وزارت تجارت کی جانب سے جاری اعدادو شمارکے مطابق پاکستان میں گزشتہ سال کے مقابلہ میں کپاس کی پیداوار میں71فیصد،پنجاب میں2.1ملین گانٹھوں کے ساتھ34فیصد جبکہ سندھ میں3.0ملین گانٹھوں کے ساتھ 113فیصد اضافہ ہوا ۔گزشتہ برس ملک میں بڑے پیمانے پر سیلاب کی وجہ سے کپاس کی پیداوار میں34فیصد کمی کی وجہ سے بڑا دھچکا لگا تھاتاہم رواں سال کپاس کی پیداوارشاندار کارکردگی سے نہ صرف پچھلے سال کے اعداد و شمار سے آگے نکل گئی بلکہ توقعات سے بھی بڑھ گئی ہے۔وفاقی وزیر تجارت ڈاکٹر گوہر اعجاز نے کپاس کے شعبے کیلئے اپنی امید کا اظہار کرتے ہوئے کہاہے کہ کپاس کی آمد یکم اکتوبر 2023کو 50 لاکھ گانٹھوں کو عبور کرنا، پاکستان کے لیے ایک اہم کامیابی ہے،گزشتہ سال ہماری کل فصل 50لاکھ تھی، اس سال ہم 12ملین گانٹھوں کی بمپر فصل کی توقع کر رہے ہیں،یہ قابل ذکر ترقی کسانوں کی لگن ، محنت اور کپاس کی صنعت کی لچک کو ظاہر کرتی ہے۔