بھارتی میڈیا نے کرکٹ ورلڈ کپ 2023 کے بھارتی شہر احمد آباد میں ہونے والے میچز کے دوران دہشتگردی کا خدشہ ظاہر کیا ہے۔
ورلڈ کپ کا افتتاحی میچ پچھلے میگا ایونٹ کی دفاعی چیمپئن انگلینڈ ا ور رنرز اپ نیوزی لینڈ کے درمیان کل احمد آباد کے نریندر مودی اسٹیڈیم میں کھیلا جائے گا،تاہم ورلڈ کپ شروع ہونے سے قبل بھارتی میڈیا دعویٰ کر رہا ہے کہ احمد آباد میں ہونے والے میچز کے دوران دہشتگردی کا خطرہ ہے۔
بھارتی میڈیا کے مطابق احمد آباد میں ہونے والے میچز میں دہشتگردوں کی جانب سے حملے کی دھمکی دی گئی ہے جس کے بعد احمد آباد اسٹیڈیم اور اطراف میں سکیورٹی بڑھا دی گئی ہے ،بھارتی میڈیا کے مطابق احمد آباد اسٹیڈیم اور اطراف میں 3 ہزار سے زائد پولیس اہلکار تعینات ہوں گے جبکہ میچز کے دوران اسٹیڈیم جانے والی سڑک کو مکمل بند رکھنے کا فیصلہ کیا گیا ہے۔ احمد آباد اسٹیڈیم میں میچ کے دوران موبائل فون کے علاوہ کوئی چیز اندر لے جانے کی اجازت نہیں ہو گی۔
واضح رہے کہ احمد آباد میں ورلڈکپ کے افتتاحی اور پاک بھارت میچ سمیت کل 5 میچز شیڈول ہیں، آئی سی سی ورلڈ کپ کا فائنل میچ بھی احمد آباد کے نریندر مودی اسٹیڈیم میں کھیلا جائے گا۔
