کھٹمنڈو (آن لائن) پاکستان ٹیم نے وہیل چیئر ٹی 20کرکٹ ایشیا کپ میں بھارت کو شکست دیدی۔ بھارت 242 رنز کے تعاقب میں 8 وکٹوں پر 203 رنز ہی بناسکا اور 38 رنز سے شکست کھا کر ٹورنامنٹ سے باہر ہوگیا۔
نیپال کے دارالحکومت کھٹمنڈو میں ٹی 20کرکٹ ایشیا کپ میں پاک بھارت ٹاکرے میں بھارت نے ٹاس جیت کر پاکستان کو بیٹنگ کی دعوت دی۔پاکستانی اوپنرز محمد عدنان اور عمر گل نے اننگز کا شاندار آغاز کیا اور پہلی وکٹ پر 98رنز بنائے، محمد عدنان 39 رنز بنا کر معین خان کی گیند کا نشانہ بنے۔
عمر گل اور محمد لطیف نے سکور201 رنز تک پہنچایا۔ محمد لطیف کو منوج نے آوٹ کیا، انہوں نے 24 گیندوں پر 61 رنز بنائے۔ 208 رنز پر عمر گل شیوا جی کی گیند پر وکٹ کیپر محمد عدیل کو گیند تھما بیٹھے۔
انہوں نے 53 گیندوں پر 89 رنز بنائے۔216 کے مجموعی سکور پر پہلے ساجد عباسی اور پھر محمد فیض رن آوٹ ہوئے، ساجد 5 رنز بناسکے اور فیض صفر پر آوٹ ہوئے۔ مثل خان 23 اور احمد یار 4 رنز کے ساتھ ناٹ آوٹ رہے اور گرین شرٹس نے مقررہ اوورز میں 5 وکٹوں کے نقصان پر 241 رنز بنائے۔
بھارت کے شیوا جی، منوج اور معین خان نے ایک، ایک وکٹ لی۔ ہدف کے تعاقب میں بھارتی ٹیم 8 وکٹوں پر 203 رنز بناسکی اور پاکستان کے ہاتھوں 38 رنز سے شکست کھا کر ٹائٹل کی دوڑ سے باہر ہوگئی۔
گرین شرٹس نے مسلسل دوسری بار فائنل میں رسائی حاصل کی۔راماوتھ کٹیشور کی 103 رنز کی ناقابل شکست اننگز بھی ٹیم کو ناکامی سے نہ بچاسکی، پرشورم نے 53 رنز بنائے۔ محمد فیض نے 4 کھلاڑیوں کو آوٹ کیا۔
مثل خان ایک وکٹ لے سکے، عمر گل کو مین آف دی میچ کا ایوارڈ دیا گیا۔ ایشیا کپ کا فیصلہ کن معرکہ دفاعی چیمپئن پاکستان اور سری لنکا کے درمیان آج کھیلا جائے گا۔#/s#
