ترک جنگی طیاروں کی شام میں بمباری کے نتیجے میں 20 کرد جنگجو ہلاک اور متعدد زخمی ہو گئے۔
برطانیہ میں قائم ’’سیریئن آبزرویٹری فار ہیومن رائٹس‘ کے مطابق ترکیہ کے جنگی طیارے نے کرد جنگجوؤں کے شام میں بنائی گئی خودساختہ ریاست میں ایک فوجی تربیتی مرکز پر بم برسائے ، حملے میں 20 کرد جنگجو ہلاک اور 50 سے زائد زخمی ہو گئے۔ زخمیوں میں سے 15 کی حالت تشویشناک بتائی جا رہی ہے جس کے باعث ہلاکتوں میں اضافے کا خدشہ ظاہر کیا جا رہا ہے۔
یاد رہے کہ شام میں داعش اور حکومتی افواج کے درمیان طویل عرصے سے جاری خانہ جنگی کے درمیان ملک کے شمال مشرقی علاقے میں کردوں نے اپنی ایک نیم خودمختار ریاست قائم کر لی ہے۔
ترکیہ میں بھی یہ علیحدگی پسند کردستان ورکرز پارٹی کے نام سے کام کر رہے ہیں جسے ترک اور اس کے مغربی اتحادیوں نے دہشتگرد گروپ کے طور پر درج کیا ہے، یہ علیحدگی پسند جنگجو ترکیہ میں مختلف کارروائیوں میں ملوث پائے گئے ہیں۔
